გორის სამხედრო ჰოსპიტალის დირექტორის, დავით ბარლიანის ინფორმაციით, ამ დროისთვის სამხედრო ჰოსპიტალში დაკვირვებას ოთხი პაციენტი გადის და არცერთ მათგანს ახალი კორონავირუსი არ უდასტურდება.
როგორც დავით ბარლიანმა აღნიშნა, გორის სამხედრო ჰოსპიტალში საკარანტინო სივრცე პირველი მარტიდან მოეწყო და მასში საჭიროების შემთხვევაში, 180 პაციენტის მიღებაა შესაძლებელი.
„ჩვენ მივიღებთ მხოლოდ რისკ ჯგუფში შემავალ პაციენტებს, რომლებსაც მოვათავსებთ იზოლირებულ პალატებში, ბოქსებში და ნახევრად ბოქსირებულ პალატებში. დავიცავთ მთელ რეგულაციებს, რაც ჯანდაცვის სამინისტროს აქვს მოწოდებული. ჩვენ გვყავს სამი სამხედრო მოსამსახურე და ერთი სამოქალაქო პირი, რომლებიც იმყოფებიან დაკვირვების ქვეშ და ანალიზებიდან გამომდინარე მათ არ უდასტურდებათ აღნიშნული ვირუსი“, - განაცხადა დავით ბარლიანმა. ამასთან, სამხედრო ჰოსპიტალის დირექტორის განცხადებით, დაკვირვების ქვეშ მყოფი სამხედროები იტალიიდან ჩამოვიდნენ.
მისივე თქმით, გორის სამხედრო ჰოსპიტალში ბოქსირებული და ნახევრად ბოქსირებული პალატები რამდენიმე კორპუსშია განლაგებული, რაც საჭიროების შემთხვევაში პაციენტების იზოლირების ეფექტურ საშუალებას წარმოადგენს.