40%-იან პრინციპზე შეთანხმების მზაობა არის, თუმცა ამას სჭირდება სხვა ჩამკეტი მექანიზმები იმისთვის, რომ მანდატების მანიპულაციით მისი ეჭვქვეშ დაყენება არ მოხდეს, - ამის შესახებ დამოუკიდებელმა დეპუტატმა ეკა ბესელიამ ჟურნალისტებს მოლაპარაკებებთან დაკავშირებით განუცხადა. მისი თქმით, იქამდე, ვიდრე გადაწყვეტს, მხარი დაუჭიროს თუ არა საარჩევნო სისტემის ცვლილებაზე კონსტიტუციური კანონის პროექტს, მნიშვნელოვანია გაირკვეს, როგორი იქნება მისი წერილობითი ფორმულირება.
„გაჩნდა შანსი, რომ გარკვეული კონსენსუსი შედგეს და რამდენიმე პრინციპულ საკითხზე მაინც შესაძლებელი გახდეს შეთანხმება. პირველი ეს არის 40%-იანი პროპორციული ზღვარი ყველა იმ პარტიისთვის, ვისაც მთავრობის დაკომპლექტების პრეტენზია აქვს. ამ პრინციპზე შეთანხმების მზაობა არის, თუმცა ამას სჭირდება სხვა ჩამკეტი მექანიზმები იმისთვის, რომ არ მოხდეს მანდატების მანიპულაციით ამ პრინციპის ეჭვქვეშ დაყენება. ამიტომ, ვიდრე ჩემს აზრს გეტყოდეთ, რას დავუჭერ მხარს და რას - არა, მნიშვნელოვანია წერილობითი ფორმით ვნახო ეს ფორმულირება. ერთია, რა ისმის ზეპირად, მეორეა, რა დაიწერება კონსტიტუციასა და საარჩევნო კოდექსში. ხშირად გვინახავს ზეპირი განცხადება, რომელიც წერილობით ფორმულირებაში აბსოლუტურად სხვა შინაარსის მატარებელი იყო. გარდა ამისა, საჭიროა კონსულტაციები ოპოზიციურ პარტიებთან. დღევანდელი შეხვედრის ფარგლებშიც იქნება მსჯელობა და გავიგებთ მეტ დეტალს, ვინ რა პოზიციაზე დგება.
უპრეცედენტო ძალისხმევა გამოიჩინეს საერთაშორისო ორგანიზაციებმა და დიპლომატებმა. მათ მართლაც ეკუთვნით განსაკუთრებული მადლობა, რომ არ დაიღალნენ და იყო საოცარი კოორდინაცია. საპასუხისმგებლოა, რომ ეს პროცესი ჩვენი მხრიდანაც დანახული იყოს,“ - განაცხადა ბესელიამ.
