საქართველოს საგარეო საქმეთა სამინისტროს ინფორმაციით, მეზობელ ქვეყნებთან კონსულტაციების შედეგად, აზერბაიჯანი და სომხეთი ირანიდან საქართველოსკენ მომავალ ტვირთებსა და ფიზიკურ პირებს გამოატარებს.
როგორც საგარეო საქმეთა მინისტრის მოადგილე ალექსანდრე ხვთისიაშვილი აცხადებს, საგარეო საქმეთა სამინისტრო მუდმივ კოორდინაციაშია პარტნიორი ქვეყნების შესაბამის უწყებებთან, რათა კორონავირუსის გავრცელების პრევენციის ღონისძიებები მათთან ერთად დააკორდინიროს.
„რამდენიმე დღის წინ გავრცელდა ინფორმაცია, რომ აზერბაიჯანისა და სომხეთის რესპუბლიკებმა, შექმნილი ვითარების გამო, საზღვარი დახურეს ირანის ისლამურ რესპუბლიკასთან. შექმნილი ვითარების გამო გადაადგილების პრობლემა შეექმნათ საქართველოს მოქალაქეებს, რომლებიც მოდიან ირანის ისლამური რესპუბლიკიდან. აზერბაიჯანის რესპუბლიკასთან ჩატარებული კონსულტაციების შედეგად მოგვარებულია დღევანდელ დღეს ეს პრობლემა და სატვირთო საშუალებები უკვე გამოტარებულია საზღვარზე, მოემგზავრებიან საქართველოსკენ. სომხეთის რესპუბლიკასთან მიღწეულია შეთანხმება, რომ ფიზიკური პირები, რომლებიც მოდიან ირანის ისლამური რესპუბლიკიდან სომხეთ- ირანის საზღვრიდან სპეციალური ტრანსპორტით და სპეციალური კორიდორის მეშვეობით ტრანსპორტირებულები იყვნენ საქართველო- სომხეთის საზღვრამდე“, - განაცხადა ხვთისიაშვილმა.