როგორც ჩანს, ხელისუფლებამ ლობისტური კომპანიების დაქირავებით გადაწყვიტა, რომ „ნაცარქექია“ და „სიზმარა“ მოუყვეს ქართველ ხალხსა და საერთაშორისო პარტნიორებს, - ამის შესახებ ჟურნალისტებს იუსტიციის უმაღლესი საბჭოს არამოსამართლე წევრმა ანა დოლიძემ განუცხადა.
მისი თქმით, დემოკრატიული ქვეყნების გამოცდილება აჩვენებს, რომ ორი ეტაპის მერე ხელისუფლება უნდა შეიცვალოს.
„ქართული ოცნების“ მხრიდან სხვადასხვა ტიპის ზღაპრულ წარმოდგენებს მიჩვეული ვართ. მათ გადაწყვიტეს, განსაკუთრებით ლობისტური კომპანიების დაქირავებით, რომ როგორც ჩანს, „ნაცარქექია“ და „სიზმარა“ უნდა მოუყვნენ ქართველ ხალხსა და საერთაშორისო პარტნიორებს. სინამდვილეში, დემოკრატიულ ქვეყენებში გამოცდილება გვიჩვენებს - ორი ეტაპის მერე ხელისუფლება უნდა შეიცვალოს. ეს შეიცვლება 110-ით 40-ზე თუ ა.შ. ხელისუფლებში ინტერესშია, რომ მან შექმნას სამართლიანი თამაშის წესები, რომ მოხდეს დემოკრატიული, მშვიდობიანი ცვლილება და ჩვენ არ ვიყოთ იძულებულები, რომ მოვახდინოთ სრული მობილიზება მეორე მხარეს“, - განაცხადა დოლიძემ.
მისივე თქმით, ხელისუფლებასა და ოპოზიციას შორის მოლაპარაკებები კონსტრუქციული არ არის, რადგან არასამართლიანი ვითარებაა.
„მოლაპარაკებებს „კონსტრუქციულს“ მხოლოდ ბრჭყალებში თუ დავუძახებთ, რადგან მოლაპარაკება უნდა წარიმართოს, როცა თანაბრად, კომფორტულად არის ორივე მხარე. ამ შემთხვევაში ასეთი ვითარება არ გვაქვს. ცალ მხარეს არის ხელისუფლება, რომელსაც აქვს ძალაუფლებისა და წნეხის ყველა ბერკეტი და ამ ბერკეტს ის ხშირად იყენებს ოპოზიციის წარმომადგენლების მიმართ. თუმცა, იმ გლობალურ ფონზე, რომელიც შეიქმნა ჩვენს სახელმწიფოსთან და ხელისუფლებასთან დაკავშირებით, იმ უდიდეს წნეხის ფონზე, რომლის მიხედვითაც, ყოველ დღე ჩვენი მთავარი პარტნიორი სახელმწიფოდან მოდის განცხადება-განცხადებაზე, ვფიქრობ, ძალიან მნიშვნელოვანია, ხელისუფლებამ გაიაზროს, რომ ამ შემთხვევაში მისი მხრიდან ხალხის ნების, დემოკრატიული მისწრაფებების ნების უგულებელყოფა აზიანებს არამარტო ხელისუფლებას, არამედ გარდაუვალია, რომ დააზიანებს მთლიანად სახელმწიფოს“, - აღნიშნა დოლიძემ.