ვფიქრობ, რომ შეწყალების საკითხებთან დაკავშირებით კრიტიკული და მომავალზე ორიენტირებული კომენტარები პრეზიდენტმაც გააკეთა, მეც გავაკეთე და ბევრმა ჩვენმა კოლეგამაც, - ასე პასუხობს პარლამენტის პირველი ვიცე - სპიკერი გია ვოლსკი ჟურნალისტების კითხვას, რამდენად უნდა ესაუბრა პრეზიდენტს თავის მოხსენებაში შეწყალების საკითხზე და ამით პასუხი გაეცა იმ კითხვებისთვის, რომელიც ამ თემასთან დაკავშირებით არსებობს.

გია ვოლსკი მიიჩნევს, რომ პრეზიდენტის მოხსენება საინტერესო იყო.

„მსოფლიოში საკმაოდ სერიოზული, დიდი გამოწვევებია, რასაც ჩვენ ნაკლებ ყურადღებას ვაქცევთ. ეს სხვადასხვა შიდა პოლიტიკური ვითარებით არის გამოწვეული, ვირუსის თემაც პრობლემატურია. საერთოდ, ურთიერთობები საქართველოში მნიშვნელოვნად შეიცვალა და ცუდ მაგალითს აძლევენ ამას პოლიტიკური ჯგუფები. მე რომ ვყოფილიყავი გამომსვლელი ტრიბუნასთან, იგივე თემებზე გავაკეთებდი აქცენტს. ახალგაზრდებისთვის საერთოდ მეტი სტიმულია მისაცემი, მეტი კარგი მაგალითი,"- განაცხადა გია ვოლსკიმ.