სირიის პრეზიდენტმა ბაშარ ალ-ასადმა რუსულ ტელეარხ „რასია 24“-ს ინტერვიუ მისცა, სადაც თურქეთთან ურთიერთობებზე ისაუბრა. მისი თქმით, სირიას თურქეთის მიმართ მტრული ქმედებები არ ჩაუდენია.

„რა დიდი ან პატარა მტრული ქმედებები ჩაიდინა სირიამ თურქეთის წინააღმდეგ? ეს არ მოხდარა. არის სირიელებისა და თურქების საერთო ქორწინება, ოჯახები, მნიშვნელოვანი საერთო ინტერესები. ეს ორმხრივი კულტურული ერთობა ისტორიულად არის განსაზღვრული. ალოგიკურია, რომ ჩვენ შორის სერიოზული უთანხმოება იყოს“,-განაცხადა ასადმა.

მისივე თქმით, თურქები მოძმე ერად მიაჩნია.

„რა თქმა უნდა, თურქებს მოძმე ერად მივიჩნევ. მინდა ვკითხო თურქ ხალხს, რა პრობლემები გაქვთ სირიასთან?“-აღნიშნა ასადმა.

ცნობისთვის, ბოლო რამდენიმე კვირაა იდლიბში პროთურქულ სირიის ოპოზიციასა და რუსეთის მიერ მხარდაჭერილ ასადის ჯარებს შორის ბრძოლა მიმდინარეობს. თურქეთის პრეზიდეტმა, რეჯეფ ტაიფ ერდოღანმა, რამდენიმე გაფრთხილების შემდეგ რეგიონში სამხედრო ყოფნა გააძლიერა. ბოლო დღეების მანძილზე სირიის სამთავრობო ძალების ინტენსიური თავდასხმის შედეგად თურქეთის ათობით ჯარისკაცი დაიღუპა.