დაავადებათა კონტროლის ეროვნული ცენტრის დირექტორი ამირან გამყრელიძე თვითიზოლაციასა და კარანტინში მყოფ პირებს მოუწოდებს, რომ არსებული წესები დაიცვან.
გამყრელიძის თქმით, თუ მოქალაქეები დაიცავენ ყველა წესს, ამით ინფექციის გავრცელების შეკავებას შეუწყობენ ხელს.
„მოვუწოდებ თვითიზოლაციასა და კარანტინში მყოფ პირებს. თხოვნაა უმორჩილესი, დაიცვან მაქსიმალურად კარანტინის წესები. ამით ისინი მნიშვნელოვნად შეუწყობენ ხელს ინფექციის შეკავებას და არ გავრცელებას. ეს გახლავთ მათი დიდი სამოქალაქო პასუხისმგებლობა. თუ ისინი დაიცავენ ყველა წესს, ჩვენ წინ აღვუდგებით ინფექციის გავრცელებას. ბევრია დამოკიდებული იმ ადამიანებზე, ვინც დღეს იმყოფებიან კარანტინში და თვითიზოლაციაში და ეს არის მათი მოქალაქეობრივი ვალი“, - განაცხადა გამყრელიძემ.
მისივე თქმით, ზოგადი რეკომენდაციები იგივე რჩება.
„ეს არის თავის არიდება საერთაშორისო მგზავრობაზე, არამარტო მაღალდასენიანებულ ქვეყნებში, არამედ ზოგადად. უკვე ასეული შემთხვევაა ევროპის წამყვან ქვეყნებში და ინფექცია ჯერჯერობით ვრცელდება. მოვერიდოთ მოგზაურობას მაქსიმალურად თუ ამის აუცილებლობა არ არის და მივდივართ, დავიცვათ წესები“, - განაცხადა გამყრელიძემ.