პოლიტპატიმრების განცხადება ძალიან ვაჟკაცურია, მაგრამ ჩვენ ხელისუფლებას არ მივცემთ პოლიტიკურ მძევლებად მათი დატოვების უფლებას, - ამის შესახებ ფრაქცია "ნაციონალური მოძრაობის" თავმჯდომარე რომან გოცირიძემ ჟურნალისტებს განუცხადა, რითაც „ევროპული საქართველოს“ ერთ-ერთი ლიდერის, გიგი უგულავას განცხადებას გამოეხმაურა.

მისი თქმით, მმართველი გუნდის მიერ შეთავაზებული მოდელით არჩევნების ჩატარება ნიშნავს, რომ ის "ფეოდალური სისტემით" ჩატარდება.

"პოლიტპატიმრების ეს განცხადება ძალიან ვაჟკაცურია, მაგრამ ჩვენ ხელისუფლებას არ მივცემთ

პოლიტიკურ მძევლებად მათი დატოვების უფლებას. ჩვენი მოთხოვნაა პროპორციულ სისტემასთან მაქსიმალურად მიახლოებული მოდელის შემოთავაზება და პოლიტიკური დევნის შეწყვეტა, მათ შორის პოლიტპატიმრების გათავისუფლება. "ქართული ოცნება" მაინც არეგისტრირებს იმ ვარიანტს, რომელიც ოპოზიციისთვის თავიდანვე მიუღებელია. მსგავსი სქემით არჩევნებზე გასვლა კვლავ ნიშნავს იმას, რომ საქართველოში არჩევნები ჩატარდება ისევ ფეოდალური სისტემით, რასაც მაჟორიტრული სისტემა ჰქვია. "ქართული ოცნება" კვლავ ეცდება გაყალბებითა და მაჟორიტარების გამოყენებით ძალაუფლების შენარჩუნებას, თუმცა როგორიც არ უნდა იყოს არჩევნების ჩატარების წესი, ვერ უშველის "ქართულ ოცნებას" იმიტომ, რომ იგი პოლიტიკურად განწირული პარტიაა და ისტორიულ სანაგვეს ჩაბარდება მათ მიერ მოტანილი წარუმატებელი წლების გამო," - განაცხადა გოცირიძემ.