„ერთიანი საქართველოს“ ლიდერის, ნინო ბურჯანაძის შეფასებით, გიგი უგულავას განცხადებამ „ქართულ ოცნებას“ პოლიტიკური რეპრესიების თემაზე ვაჭრობის საშუალება მოუსპო.
როგორც ბურჯანაძემ „ინტერპრესნიუსთან“ საუბრისას აღნიშნა, უგულავას მხრიდან ეს ღირსეული და დასაფასებელი ნაბიჯია.
„მე მაშინაც ვთქვი, როდესაც გიგი უგულავა დააკავეს, რომ ის ღირსეულად იქცეოდა დაკავების პერიოდშიც. მისი ეს განცხადება არის ღირსეული და გონივრული განცხადება და ნამდვილად საქმის და ქვეყნის ინტერესებიდან გამომდინარე გაკეთებული განცხადება. ეს ძალიან დასაფასებელია და მივესალმები ამ განცხადებას. მიმაჩნია, რომ ძალიან ვაჟკაცური ნაბიჯი გადადგა გიგი უგულავამ ამით და რეალურად, ერთხელ და საბოლოოდ „ქართულ ოცნებას“ მოუსპო პოლიტიკური რეპრესიების თემაზე ვაჭრობის საშუალება. ეს ძალიან ღირსეული ნაბიჯია, რომელიც დაეხმარება პროპორციული არჩევნების მოპოვების საკითხს. თუ ამის შემდეგადაც „ქართულმა ოცნებამ“ არ გადმოდგა პოზიტიური ნაბიჯები, ის უბრალოდ იქნება ყველას თვალში კიდევ ერთი ნათელი დადასტურება იმისა, რომ „ქართულ ოცნებას“ არაფერი აინტერესებს გარდა იმისა, რომ ნებისმიერ ფასად შეინარჩუნოს ძალაუფლება“, - განაცხადა ბურჯანაძემ.
შეგახსენებთ, რომ პატიმრობაში მყოფი თბილისის ყოფილი მერი, „ევროპული საქართველოს“ ერთ-ერთი ლიდერი გიგი უგულავა აცხადებს, რომ ის ივანიშვილთან „კატა-თაგვობანას“ თამაშს არ აპირებს.
„არ მსურს ჩემი გათავისუფლების საკითხი გახდეს ბარიერი მაქსიმალურად პროპორციული სისტემის მიღების პროცესში, რაც ქვეყანას, მის მშვიდობიან განვითარებას, ჰაერივით სჭირდება“, - ნათქვამია გიგი უგულავას წერილში, რომელიც მის „ფეისბუქ“ გვერდზე გავრცელდა.