ბესიკ თამლიანი უერთდება გიგი უგულავასა და გიორგი რურუას სულისკვეთებას და მზად არის გააგრძელოს ყოფნა უკანონო პატიმრობაში, რათა მისი უკანონო პატიმრობისგან გათავისუფლება არ გახდეს ვაჭრობის საგანი - ამის შესახებ ბესიკ თამლიანის ადვოკატმა, ლევან იოსელიანმა განაცხადა.

ადვოკატის თქმით, ის დარწმუნებულია დაცვის მხარის პოზიციის სიმყარეში და ბრძოლას გააგრძელებენ.

"ბესიკ თამლიანი რჩება ირაკლი ოქრუაშვილთან ერთად იმ პრინციპულ ადამიანად, რომელიც არ დათანხმდა საპროცესო შეთანხმებას და ბოლომდე იბრძვის საკუთარი უდანაშაულობის დასამტკიცებლად. მე როგორც მისი ადვოკატი დარწმუნებული ვარ ჩვენი პოზიციის სიმყარეში და გავაგრძელებთ ბრძოლას, ვიდრე მისი უდანაშაულობა არ იქნება დადასტურებული", -აცხადებს ლევან იოსელიანი, რომელის კომენტარსაც „სამოქალაქო მოძრაობა“ ავრცელებს.