გია არაბიძემ ტექნიკური უნივერსიტეტის ენერგეტიკის ფაკულტეტის დეკანის თანამდებობა დატოვა

საქართველოს ტექნიკური უნივერსიტეტის ენერგეტიკისა და ტელეკომუნიკაციის ფაკულტეტის დეკანმა, პროფესორმა გია არაბიძემ, თანამდებობა დატოვა, - ამის შესახებ „ინტერპრესნიუსს“ სტუ-ის საზოგადოებასთან ურთიერთობის დეპარტამენტიდან აცნობეს.

მათივე ცნობით, თანამდებობიდან წასვლის შესახებ განცხადება გია არაბიძემ ტექნიკური უნივერსიტეტის ენერგეტიკისა და ტელეკომუნიკაციის ფაკულტეტის საბჭოს სხდომაზე დღეს გააკეთა. ფაკულტეტის საბჭოს სხდომას საქართველოს ტექნიკური უნივერსიტეტის რექტორი, პროფესორი დავით გურგენიძე, სტუ-ის ადმინისტრაციის ხელმძღვანელი კარლო კოპალიანი, ფაკულტეტის პროფესორ-მასწავლებლები და უნივერსიტეტის ადმინისტრაციის წარმომადგენლები ესწრებოდნენ.

„რკინასაც და ბეტონსაც თავისი დაღლილობის, სიმტკიცისა და გამძლეობის კოეფიციენტი აქვს. ვიგრძენი, რომ ეს დაღლილობა შენიღბულად შემოვიდა ჩემში, ვიგრძენი, რომ უკვე დრო იყო, წავსულიყავი. ოპერატიული საქმიანობისთვის არ მყოფნის ენერგია. მაგრამ გეთანხმებით, სრული ენერგია მაქვს კონსულტაციებისთვის, რჩევებისთვის, მაგრამ ის ენერგია, რაც უნივერსიტეტის ერთ-ერთი მსხვილი ფაკულტეტის ხელმძღვანელობას სჭირდება, აღარ მაქვს. ბევრმა თქვენგანმა კარგად იცის, რომ დღეში 18 საათს ფაკულტეტზე ვატარებდი - ამას მოითხოვდა ის საქმე, რომელიც ძალიან მიყვარს. მაგრამ ასე გაგრძელება აღარ შემეძლო. ამიტომ, სამჯერ მივმართე რექტორატს - ორჯერ ჩემი თხოვნა არ დააკმაყოფილეს. მადლობას ვუხდი ჩემს უნივერსიტეტს, რექტორს, ფაკულტეტს, ჩემს კოლეგებს მრავალწლიანი ურთიერთობისთვის, ნაყოფიერი თანამშრომლობისთვის. განსაკუთრებული მადლობა მინდა ვუთხრა სტუდენტებს, კურსდამთავრებულებს, რომლებიც დღეს ენერგეტიკის დარგს ერთგულად ემსახურებიან“, - აღნიშნა გია არაბიძემ.

სტუ-ის საზოგადოებასთან ურთიერთობის დეპარტამენტის ინფორმაციით, საქართველოს ტექნიკური უნივერსიტეტის რექტორმა, პროფესორმა დავით გურგენიძემ, ფაკულტეტის პროფესურამ, ადმინისტრაციის წარმომადგენლებმა პროფესორ გია არაბიძეს მრავალწლიანი დაუღალავი შრომისთვის, მრავალი წარმატებული სტუდენტის აღზრდისთვის, ენერგეტიკის დარგის განვითარებაში შეტანილი წვლილისთვის მადლობა გადაუხადეს და იმედის გამოთქვეს, რომ გია არაბიძე კვლავაც ტექნიკურ უნივერსიტეტში გააგრძელებს მოღვაწეობას და თავის პროფესიონალიზმსა და ცოდნას მომავალი ენერგეტიკოსების აღზრდას მოახმარს.

მათივე ინფორმაციით, პროფესორი გია არაბიძე ტექნიკური უნივერსიტეტის ენერგეტიკისა და ტელეკომუნიკაციის ფაკულტეტის დეკანის თანამდებობას 2005 წლიდან იკავებდა. დღეიდან, გია არაბიძე სტუ-ში საქმიანობას პროფესორის რანგში გააგრძელებს.

ზაალ ანჯაფარიძე - ოპოზიციის მიერ დანიელსონის დოკუმენტის რევიზიის მცდელობა მათი კიდევ ერთი უგუნური შეცდომა იქნება, ამ შემთხვევაში, ოპოზიციას დასავლეთის მხარდაჭერის იმედი ნაკლებად შეიძლება ჰქონდეს
ქართული პრესის მიმოხილვა 16.04.2021
არასტანდარტულ დროში არაკონვენციური გადაწყვეტის როლზე: საქმე ხელშესახები შედეგის მისაღწევად
„ლისი დეველოპმენტისა“ და ჰოლანდიური განვითარების ბანკ - FMO-ს შორის 10-წლიანი წარმატებული თანამშრომლობა დასასრულს მიუახლოვდა
ფინკა ბანკი - ექსკლუზიური პირობები ფერმერებს აგრო სესხებზე
„ხალიკ ბანკი საქართველოს“ გრძელვადიანი რეიტინგის მაჩვენებელი BB დონიდან BB+ დონემდე გაუმჯობესდა
საგაზაფხულო შეთავაზება პროექტისგან “მოედანი“
კრიპტალზე ვიზა და მასტერქარდის გამოყენებით ლარის განაღდება უფასო გახდა
ლიბერთისა და ნიუ ვიჟენის პარტნიორობა - აგრო დაზღვევის ახალი სერვისი ფერმერებისთვის
„ტერასა რეზორთ ბაკურიანის“ განსაკუთრებული შეთავაზება აპარტამენტებზე 30 აპრილამდე გრძელდება