20 ივნისის საქმეზე დაკავებული ბესიკ თამლიანის ადვოკატი ლევან იოსელიანი აცხადებს, რომ მომდევნო სხდომაზე, როცა ბრალდების მხარე მოწმეების დაკითხვას დაასრულებს, თამლიანის მიმართ შეფარდებული აღკვეთის ღონისძიების პატიმრობის შეცვლის შუამდგომლობას დააყენებს.
როგორც სასამართლო პროცესის დასრულების შემდეგ ლევან იოსელიანმა ჟურნალისტებს განუცხადა, ბესიკ თამლიანის პატიმრობაში ყოფნის საფუძვლები არც აქამდე ყოფილა, თუმცა, მოწმეთა დაკითხვების დასრულების შემდეგ, ბრალდების მხარე თამლიანის მხრიდან მოწმეებზე ზემოქმედების საფრთხეს ვეღარ განიხილავს.
„იმედს გამოვთქვამ, რომ სასამართლო აღნიშნულ შუამდგომლობას დააკმაყოფილებს. სხვა შემთხვევაში, ბესიკ თამლიანი, როგორც პოლიტიკური პატიმარი ისე განიხილება. მხოლოდ ბესიკ თამლიანი და ირაკლი ოქრუაშვილი რჩებიან 20 ივნისის საქმეზე პატიმრობაში. ბესიკ თამლიანი ბრალს არ აღიარებს, ის საპროცესო გარიგებას არ დათანხმდა, ვინაიდან თავს უდანაშაულოდ მიიჩნევს. საქმეში არ არის მტკიცებულება, რომელიც ადასტურებს მის ძალადობას პოლიციელის მიმართ. დღეს გამოიკითხნენ ბრალდების მოწმეები, გამომძიებლები. ძირითადი კითხვები ეხებოდა, თუ რა პირობებში მოხდა ადგილის დათვალიერება, ნახეს თუ არა მათ ის შადრევანი, სადაც ადამიანების ჩავარდნა გამოიწვევდა მათი ჯანმრთელობის დაზიანებას და ა.შ.“, - აცხადებებს იოსელიანი.