"ევროპულმა საქართველომ” კორონავირუსით გამოწვეულ ეკონომიკურ კრიზისთან ბრძოლის გეგმა წარმოადგინა. როგორც „ინტერპრესნიუსს“ პარტიის პრესსამსახურიდან აცნობეს, გეგმა გადასახადის შემცირებას გულისხმობს.

„კერძოდ ამავე წლის აპრილიდან: 1. საშემოსავლო გადასახადის 20%-დან - 17%-მდე შემცირება, რაც სამუშაო ადგილების დაკარგვას თავიდან აგვაცილებს და 380 მილიონ ლარს დაუტოვებს ხალხს; 2. ქონების გადასახადის განახევრება, რაც 195 მილიონ ლარს დაუტოვებს მეწარმეებს, რაც ასევე სამუშაო ადგილების შემირებას შეაჩერებს; 3. ნავთობპროდუქტებზე აქციზის გადასახადის 25%-ით შემცირება, რაც საწვავზე ფასს 8-10 თეთრით გააიაფებს და ზოგადად ხელს შეუშლის ფასების ზრდას. ქვეყანაში მოცემული გეგმა ითვალისწინებს კერძო სექტორში 690 მილიონი ლარის დატოვებას. ეს საბიუჯეტო დანაკლისი აუცილებლად უნდა დაბალანსდეს ბიუროკრატიული და არაეფექტური ხარჯების შეკვეცით“, - აღნიშნულია ინფორმაციაში.