პარლამენტში საქართველოს პირველი ეროვნული გმირის, საქართველოს პარლამენტის ყოფილი წევრის ჟიული შარტავასადმი მიძღვნილი ღონისძიება გაიმართა, რომელსაც პარლამენტის თავმჯდომარე, არჩილ თალაკვაძე დაესწრო. ამის შესახებ „ინტერპრესნიუსს“ პარლამენტის საზოგადოებასთან ურთიერთობის სამსახურიდან აცნობეს.

მათივე ცნობით, ღონისძიებაზე დამსწრეებს 2020 წელს საქართველოს ფოსტის მიერ გამოშვებული ჟიული შარტავას საფოსტო მარკა წარუდგინეს და ჟიული შარტავას ძეგლის პროექტის ესკიზი გააცნეს.

ღონისძიების დასასრულს, ჟიული შარტავას მეუღლემ, ლია შარტავამ ჟიული შარტავას პარლამენტის წევრის მოწმობის (საკუთარი ხელით შევსებული სააღრიცხვო ბარათით) და საქართველოს ტექნიკური უნივერსიტეტის მიერ დამზადებული სამახსოვრო ჯილდოს ეგზემპლიარი საქართველოს პარლამენტის მუზეუმში განსათავსებლად პარლამენტის აპარატის უფროსს, გივი მიქანაძეს გადასცა.

ღონისძიების დასრულების შემდეგ, სტუმრებმა საქართველოს პარლამენტის მუზეუმისთვის გამოყოფილი სივრცე დაათვალიერეს. საქართველოს ეროვნული გმირის, ჟიული შარტავას სახელობის დარბაზი და მემორიალური დაფა საქართველოს პარლამენტში 2019 წელს გაიხსნა.