ფილარმონიის წინ ქალთა მოძრაობამ პერფორმანსი - " ქალები ფემიციდის წინააღმდეგ!" გამართა.
"საფარის" დირექტორის ბაია პატარაიას განცხადებით, "ეს იყო გამოსაფხიზლებელი პერფორმანსი, რათა საზოგადოებამ გაიგოს, რომ ფემიციდი არის სოციალური პრობლემა და ამაზე პასუხისმგებელი უნდა იყოს მედია, საზოგადოება და სახელმწიფო".
მისივე თქმით, ბოლო ორ თვეში მომხდარი ფემიციდის 8 შემთხვევა არის საგანგაშო და ხელისუფლებამ ამ საკითხთან მიმართებით ბევრი რამ უნდა გააკეთოს.
"იმისთვის, რომ დასრულდეს ქალების ჩაგვრა, მათი გაძლიერება უნდა მოხდეს პოლიტიკურად, ეკონომიკურად და სოციალურად. სამწუხაროდ, ამ მიმართულებით ხელისუფლება არ მუშაობს, მარტო პოლიცია კი ამ პრობლემას ვერ მოაგვარებს", - განაცხადა ბაია პატარაიამ.
პერფორმანს პარტია "სამართლიანობისთვის" დამფუძნებელი ეკა ბესელია შეურთდა.
მისი განცხადებით, ფემიციდი არის სრულიად საზოგადოების პრობლემა. მისი პრევენციისთვის კი საჭიროა ძლიერი სამოქალაქო, ზეპარტიული პროტესტი, რომელსაც მხოლოდ საკანონმდებლო ცვლილება არ უშველის.
"ბოლო პერიოდში ბევრი ძალადობის ფაქტი ვნახეთ ქალების მიმართ და თუ ამაზე თვალს დავხუჭავთ, ხელს შევუწყობთ პროვოცირებას. ამიტომ, ყოველი ასეთი შემთხვევის შემდეგ, ძლიერი საპროტესტო ტალღაა საჭირო" , - თქვა ეკა ბესელიამ.
იხილეთ ვიდეო: "დამნაშავე ხარ შენ!" - ფილარმონიასთან ფემიციდის წინააღმდეგ აქცია გაიმართა