რუსეთის პრეზიდენტის ვლადიმერ პუტინის აზრით, ისეთი ქვეყნისთვის როგორიც რუსეთია, ხელისუფლების ცვლილება მნიშვნელოვანია, რაც იმას ნიშნავს, რომ რუსეთის პრეზიდენტად ერთი და იგივე პიროვნების რამდენჯერმე არჩევის შესაძლებლობა შეზღუდული უნდა იყოს.

როგორც „ინტერფაქსი“ იტყობინება, ამის შესახებ მან ერთ-ერთი ფილმისთვის მიცემულ ინტერვიუში განაცხადა, რომლის ფრაგმენტი ტელეკომპანია „რასიაზე“ უჩვენეს.

„ბევრ ქვეყანაში, არ არსებობს არანაირი შეზღუდვა, თუ რამდენი ვადით შეიძლება იქნას პრეზიდენტი არჩეული. ისტორიული თვალსაზრისით, დასავლეთში, იგივე აშშ-ში, შეუზღუდავად შეიძლებოდა არჩევა. ეს სულ ცოტა ხნის წინ გაუქმდა, რუზველტი ოთხჯერ აირჩიეს. თუმცა, მიუხედავად ამისა, ჩემი თვალსაზრისით, იმისთვის, რომ ხელისუფლების ცვლილება იყოს გარანტირებული და ეს კი ჩვენი ქვეყნისთვის მნიშვნელოვანია, უკეთესი იქნება, თუკი პრეზიდენტად რამდენიმე ვადით არჩევა შეზღუდული იქნება“, - განაცხადა პუტინმა.

ამასთან ის მიიჩნევს, რომ რუსეთისთვის საპარლამენტო რესპუბლიკის მოდელი „აბსოლუტურად მიუღებელია“.

პუტინის მოსაზრებით, ძალის ორი ცენტრის შექმნა რუსეთის სამომავლო პერსპექტივისთვის „სრულიად დამღუპველია“. რუსეთის ლიდერმა აღნიშნა, რომ მას არ აქვს განზრახული შექმნას ქვეყნისთვის მიუღებელი სახელისუფლებო სისტემა, იმისთვის, რომ პოსტი შეინარჩუნოს.