ქართული დემოკრატია სწრაფად ვითარდება "ქართული ოცნების" პირობებში , - ამის შესახებ თბილისის მერი, პარტია "ქართული ოცნება-დემოკრატიული საქართველოს" გენერალური მდივანი კახა კალაძე "ტვიტერზე" წერს.
"„ქართულმა ოცნებამ“ ოპოზიციასთან საარჩევნო სისტემასთან დაკავშირებით კონსენსუსს მიაღწია 2020 წლისთვის, 120/30 1% ბარიერით. ქართული დემოკრატია სწრაფად ვითარდება "ქართული ოცნების" პირობებში",-წერს კალაძე "ტვიტერზე".
ცნობისთვის, მმართველ გუნდსა და ოპოზიციას შორის საარჩევნო მოდელზე შეთანხმება მიღწეულია. ამის შესახებ აშშ-ის ელჩის რეზიდენციაში ხელისუფლებისა და ოპოზიციის წარმომადგენლების შეხვედრის დასრულების შემდეგ გახდა ცნობილი.
დიალოგში მონაწილე ფასილიტატორმა ელჩებმა შეთანხმების თაობაზე განცხადებაც გაავრცელეს. როგორც ფასილიტატორი დიპლომატების განცხადებაშია ნათქვამი, დღევანდელი შეთანხმება ითვალისწინებს, რომ საარჩევნო სისტემა 2020 წლის არჩევნებისთვის დაეფუძნება 120 პროპორციულ და 30 მაჟორიტარულ მანდატს, საარჩევნო ოლქების სამართლიან განაწილებას, 1%-იან საარჩევნო ბარიერს და ჩამკეტს, რომელიც უზრუნველყოფს, რომ ხმების 40%-ზე ნაკლების მიმღებმა პარტიამ ვერ შეძლოს საპარლამენტო უმრავლესობის შექმნა.