უმრავლესობის ერთ-ერთი ლიდერის, ირაკლი კობახიძის განცხადებით, საარჩევნო სისტემასთან დაკავშირებული საკანონმდებლო ცვლილებების ინიცირება პარლამენტში მაქსიმუმ 11 მარტისთვის მოხდება.

ამასთან, კობახიძის თქმით, ტექნიკურ საკითხებთან მიმართებით ოპოზიციასთან მორიგი შეხვედრა გაიმართება.

„რაც შეეხება ბლოკებს, ეს საკითხი დარჩება ღია და ჩვენ გავაგრძელებთ კონსულტაციებს ბლოკის თემასთან დაკავშირებით . ჩვენ გვაქვს ჩვენი არგუმენტები, დაველოდებით არგუმენტებს ოპოზიციის მხრიდან და ამის საფუძველზე შევაჯერებთ პოზიციებს.

რაც შეეხება საზღვრების გადანაწილებას, სასურველია, რომ ეს საზღვრები უკვე აისახოს იმ პროექტში, რომელიც იქნება ოთხშაბათამდე, ან ოთხშაბათს ინიცირებული. შესაბამისად, ჩვენ ალბათ, ხვალინდელ დღეს გამოვიყენებთ იმისათვის, რომ დავსხდეთ ოპოზიციის წარმომადგენლებთან ერთად და განვსაზღვროთ ოლქების საზღვრები. ეს არის არსებითად ტექნიკური საკითხი, დიდი ლავირების საშულელებას არ ტოვებს ის პრინციპი, რომელზეც შევჯერდით, ანუ საუბარია, ევროსაბჭოს რეკომენდაციაზე, რომლის მიხედვით, დაცული უნდა იყოს თანაბრობის პრინციპი. არ არის დიდი ლავირების საშუალება, თუმცა, ბუნებრივია, მაინც გასავლელია თითოეული ოლქის საზღვრები და ამასთან დაკავშირებით კონსულტაციები გვექნება ოპოზიციის წარმომადგენლებთან. ამის საფუძველზე, უკვე ოთხშაბათისთვის აისახება შესაბამისი საზღვრები კანონპროექტში“, - განაცხადა ირაკლი კობახიძემ.