გორის მუნიციპალიტეტში ფერმერებმა სამდღიანი ტრენინგის ფარგლებში ხეხილისა და თხილის ბაღის გასხვლის ტექნიკა შეისწავლეს. როგორც „ინტერპრესნიუსს“ გაეროს სურსათისა და სოფლის მეურნეობის ორგანიზაციიდან (FAO) აცნობეს, ღონისძიება მათი ორგანიზებით ჩატარდა, ევროკავშირის მიერ დაფინანსებული ინიციატივის - „ინოვაციური პროექტი კერძო სექტორის კონკურენტუნარიანობისთვის საქართველოში“ - ფარგლებში.
FAO-ს ინფორმაციით, ტრენინგი სწავლების როგორც თეორიულ, ისე პრაქტიკულ ნაწილს მოიცავდა. მონაწილეებმა გასხვლის ტრენინგის პრაქტიკული მოდულები სოფელ ღველეთში მდებარე ვაშლის, მსხლისა და ბლის ბაღებში გაიარეს. ფერმერებს კონკრეტული რჩევები მიეცათ, არასწორი სხვლის ტექნიკების თავიდან ასაცილებლად, რაც ხშირად ხდება მოსავლის რაოდენობისა და შემოსავლის შემცირების მიზეზი.
ტრენინგის დასასრულს, მონაწილეებს სერტიფიკატები გადაეცათ. FAO-ს პროექტების კოორდინატორმა, ხავიერ სანს ალვარესმა აღნიშნა, რომ FAO და ევროკავშირი კვლავ გააგრძელებენ ქართველი ფერმერების, მწარმოებლებისა და სასოფლო-სამეურნეო ექსტენციის სპეციალისტების მხარდაჭერას ტრენინგებით, სემინარებითა და სხვადასხვა პუბლიკააციებით, რათა გაღრმავდეს მათი ცოდნა და გაუმჯობესდეს სამეურნეო სისტემები.
ცნობისთვის, კერძო სექტორის კონკურენტუნარიანობის პროექტი საქართველოს ბიზნესის უფრო ფართო ხელშეწყობის EU4Business ნაწილია, რომლის ფარგლებში ევროკავშირი ხელს უწყობს ქართულ მეწარმეობას, საკანონმდებლო ველის გაუმჯობესებას, ფინანსებზე ხელმისაწვდომობის გაზრდას და ევროკავშირთან თანამშრომლობის განმტკიცებას.