„ევროპული საქართველოს“ ერთ-ერთი ლიდერის, გიგა ბოკერიას განცხადებით, ოპოზიციასა და „ქართულ ოცნებას“ შორის შეთანხმების შესრულება „ევროპული საქართველოს“ მხრიდან პარლამენტში პოლიტიკურ ბოიკოტს მოხსნის.

ამასთან, როგორც ბოკერია განმარტავს, მას შეთანხმების შესრულებაში ეჭვი წინასწარ არ შეაქვს.

„მე ჩემი გუნდის, „ევროპული საქართველოს“ სახელით შემიძლია გითხრათ, რომ ამ შეთანხმების შესრულება, რა თქმა უნდა, მოხსნის პოლიტიკურ ბოიკოტს. როცა ეს შესრულდება და ჩვენ ამას დავინახავთ, რომ არსებითად სრულდება, მე იმედი მაქვს რომ ეს მოხდება, არანაირ ეჭვებს წინასწარ არ გამოვთქვამ, მაშინ, რა თქმა უნდა, პოლიტიკური ბოიკოტი მოიხსნება.

ჩვენ ძალიან დაინტერესებული ვართ პრაგმატულადაც პარლამენტში შესვლაზე იმიტომ, რომ ჩემი აზრით, „ოცნებიდან“ ჩვენ ოპონენტებზე უკეთ ვიყენებთ ტრიბუნას და თან ქვეყნისთვის ნორმალური ამბავია, რომ პარლამენტში იყოს დისკუსია. ოღონდ ამას სჭირდება ნაბიჯები ამ შეთანხმების შესრულების, რაშიც წინასწარ არანაირად არ შემაქვს ეჭვი. ვნახავთ, მოხდება, არ მოხდება და ამის მიხედვით ეს საკითხიც მოიხსნება“, - განაცხადა გიგა ბოკერიამ.