ინფექციური საავადმყოფოს სამედიცინო დირექტორი მარინა ეზუგბაია მოქალაქეებს, რომლებიც ჩამოდიან მოგზაურობიდან ან საქმიანი ვიზიტიდან, განსაკუთრებით, მაღალი რისკის ქვეყნებიდან (იტალია, ირანი, ჩინეთი და სამხრეთ კორეა) სთხოვს გამოიჩინონ მაღალი პასუხისმგებლობა და 14 დღის განმავლობაში ბინაში თვითიზოლაციას მიმართონ.
როგორც მან ჟურნალისტებს გაუცხადა, ამ ეტაპზე ეს არის მათი მხრიდან ყველაზე სწორი საქციელი.
„თვითიზოლაციაში მყოფ ადამიანს აქვს მცირე კონტაქტები სხვა პირებთან. თუ რომელიმესთან მოხდება თვითიზოლაციის პირობებში სიმპტომების გამოხატვა, ასეთი პირების გადმოყვანა მოხდება ჩვენთან. ყველაზე მთავარი არის გამოიჩინონ მაღალი პასუხისმგებლობა, ჩამომსვლელებს ვთხოვ, რომ ორი კვირის განმავლობაში დარჩნენ ბინაზე თვითიზოლაციაში. ამასთან, კარანტინში მყოფ პაციენტებს, რომლებსაც გამოუვლინდებათ რომელიმე საეჭვო ნიშანი, ყველა პაციენტი მოვა ჩვენთან, ჩაუტარდებათ კვლევა. ჩვენ გვაქვს 44 ბოქსირებული საწოლი. ამ 44 საწოლით შეგვიძლია სრულად ვმართოთ ჩვენთან მოსული ნაკადები. დღემდე ხედავთ არ ყოფილა რამე პრობლემა. ჩვენმა ცენტრმა შეძლო დღევანდელ დღემდე პაციენტების მიღება და უკან გაბრუნება თუ ნეგატიურია და თუ არადა, დატოვება და მართვა. ეს არის 24 საათიანი მუშაობის შედეგი. ამისთვის მადლობა უნდა გადაუხადოს ყველამ როგორც ექიმებს, ასევე საშუალო და დაბალი რგოლის პერსონალს. პირადად მე მინდა მადლობა გადავუახადო ჩემი ცენტრის ყველა თანამშრომელს, რომლების თავდაუზოგავად მუშაობენ. ჩვენი ცენტრი არის ქვეყანაში ერთადერთი დაწესებულება, რომელსაც აქვს მძლავრი ლაბორატორიული სამსახური,“ - განაცხადა ეზუგბაიამ.
მან განმარტა, რომ ის რაც საქართველოში ხდება, არ არის შიდა გავრცელება და ეს არის პირველი გენერაცია.
„ეს არის პირველი გენერაცია - ასე ჰქვია. შემოტანილი შემთხვევებისგან დაფიქსირდა რამდენიმე შემთხვევა. შემოსული პაციენტიდან გადავიდა ეს ვირუსი რამდენიმე ადამიანზე. ამას ჰქვია პირველი გენერაცია. იმედი მაქვს, არ იქნება მეორე გენერაცია,“ - განაცხადა ეზუგბაიამ.