მოსამართლის განცხადებით, კორონავირუსთან დაკავშირებით, სასამართლოს სხდომათა დარბაზებში მოქალაქეთა დასწრებაზე შეზღუდვები დაწესდება

თბილისის საქალაქო სასამართლოს მოსამართლის გიორგი არევაძის განცხადებით, კორონავირუსთან დაკავშირებით, სასამართლოს სხდომათა დარბაზებში მოქალაქეთა დასწრებაზე შეზღუდვები დაწესდება.

აღნიშნულთან დაკავშირებით გიორგი არევაძემ განცხადება უკანონო შემოსავლის ლეგალიზაციაში ბრალდებული მამუკა ხაზარაძის, ბადრი ჯაფარიძისა და ავთანდილ წერეთლის სასამართლო პროცესის დაწყებისას განაცხადა.

როგორც მოსამართლემ განმარტა, იუსტიციის საბჭომაც გაავრცელა განცხადება, რომელშიც საბჭო მოქალაქეებს გადაუდებელი აუცილებლობის გარდა, სასამართლო პროცესების დასწრებისგან თავის შეკავებისკენ მოუწოდებს.

„გავრცელებულ ვირუსთან დაკავშირებით ჩვენც ადეკვატური ზომები უნდა მივიღოთ. მოგეხსენებათ, იუსტიციის საბჭომაც გაავრცელა ინფორმაცია, რომ მოქალაქეებმა თავი უნდა შეიკავონ სხდომებზე დასწრებისგან. შეზღუდვები დაწესდება დარბაზებში მოქალაქეთა დასწრებაზე", - განაცხადა არევაძემ.

მოსამართლის გადაწყვეტილებით, დღევანდელი პროცესის გახსნას მხოლოდ ჟურნალისტები და არასამთავრობო ორგანიზაციის წარმომადგენლები დაესწრნენ.

რაც შეეხება ბრალდებულების სასამართლო პროცესს, ის ავთანდილ წერეთლის გამოუცხადებლობის გამო გადაიდო. როგორც წერეთლის ადვოკატმა, კახა წერეთელმა განაცხადა, მისი დაცვის ქვეშ მყოფის მკურნალობის გაგრძელება გახდა საჭირო.

მამუკა ხაზარაძესა და ბადრი ჯაფარიძეს აღკვეთის ღონისძიების სახით 700 000-700 000- ლარიანი გირაო აქვთ შეფარდებული, ავთანდილ წერეთელს კი, 500 000-ლარიანი გირაო.

შეგახსენებთ, რომ მამუკა ხაზარაძეს და ბადრი ჯაფარიძეს 24 ივლისს ბრალი წარედგინათ ჯგუფურად, 16 664 000 ამერიკული დოლარის უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობით შემოსავლის მიღება (დანაშაული გათვალისწინებული საქართველოს სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტით). რაც შეეხება ავთანდილ წერეთელს, მას უკანონო შემოსავლის ლეგალიზაციის დახმარებაში ედება ბრალი.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 14.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
თანაბარი განათლება მაღალმთიანი სოფლების ბავშვებს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით