თბილისის მერიასთან, „ანას ბაღის" დამცველმა ადგილობრივმა მოსახლეობამ ეკოლოგ ლაშა ჩხარტიშვილის მხარდაჭერით, აქცია გამართა. როგორც ადვოკატმა მუხრან ღურწკაიამ ჟურნალისტებს განუცხადა, ვიდრე "ანას ბაღის" ტერიტორიაზე უკანონო მშენებლობა არ შეჩერდება, ისინი აქციებს გამართავენ და სამართლებრივ ბრძოლას გააგრძელებენ.
„სასამართლომ აღნიშნული მშენებლობა უკვე შეაჩერა. ჩვენ ვფიქრობთ, რომ ეს არის უკანონო მშენებლობა და მერიას აქვს იმის შესაძლებლობა, რომ ინვესტორს გამოუყოს სხვა ადგილას ტერიტორია. ის ტერიტორია, სადაც უკვე მშენებლობა შეჩერებულია, გადასცეს სრულად "ანას ბაღს" და მოეწყოს იქ სკვერი, ეს არის ჩვენი მოთხოვნა. თუ ეს მოთხოვნები არ შესრულდება, მერიის წინ პერმანენტული აქციები გაგრძელდება, ასევე სამართლებრივი დავა ბოლომდე მივა, რადგან ეს ადამიანები ამ პარკის განადგურებას და მშენებლობას ნამდვილად არ დაუშვებენ. ამ ეტაპზე მერიას აქვს შესაძლებლობა, ვინაიდან სასამართლომ გარკვეული ხარვეზები დაინახა მშენებლობაში, რომ ადგილმონაცვლეობა გააკეთოს. თუ ისინი ამას არ გააკეთებენ, ჩვენ გავაგრძელებთ სამართლებრივ დავას, ასევე საპროტესტო აქციებს, ვიდრე მოსახლეობის მოთხოვნები არ დაკმაყოფილდება",-აცხადებს ადვოკატი.