კორონავირუსზე ტესტირების უარყოფითი პასუხი არ ათავისუფლებს ადამიანს თვითიზოლაციისგან, - ამის შესახებ დაავადებათა კონტროლის ეროვნული ცენტრის რისკებზე მზადყოფნისა და რეაგირების სამმართველოს უფროსმა ანა კასრაძემ დღეს გამართულ ბრიფინგზე განაცხადა.
მისივე განმარტებით, ნებისმიერი ადამიანი, რომელსაც კონტაქტი ჰქონდა დადასტურებულ შემთხვევასთან ან იმოგზაურა მაღალი რისკის ქვეყანაში, 14 დღის განმავლობაში უნდა დარჩეს იზოლაციაში.
„თვითიზოლაციაში ყოფნის დროს ტესტირების გაკეთება ნებისმიერ ლაბორატორიაში და უარყოფითი შედეგი არ ათავისუფლებს ადამიანს თვითიზოლაციისგან. აი, ეს ძალიან მნიშვნელოვანია, რადგან ბევრ მათგანს ჰგონია, რომ ლაბორატორიულ ტესტირებას, როდესაც ჩაიტარებს ნებისმიერ ლაბორატორიაში, ეს ათავისუფლებს მათ პასუხისმგებლობისგან, იყვნენ თვითიზოლაციაში. ეს ასე არ არის. ნებისმიერი ადამიანი, რომელსაც კონტაქტი ჰქონდა დადასტურებულ შემთხვევასთან ან იმოგზაურა მაღალი რისკის ქვეყანაში, 14 დღის განმავლობაში უნდა დარჩეს იზოლაციაში, მიუხედავად იმისა, თუ უარყოფითია ლაბორატორიული ტესტის შედეგი“, - განაცხადა ანა კასრაძემ.