რუსეთის დუმამ დღევანდელ სხდომაზე მხარი დაუჭირა დეპუტატ ვალენტინა ტერეშკოვას მიერ ინიცირებულ საკონსტიტუციო შესწორებას საპრეზიდენტო ვადის განულების თაობაზე.

შესწორების თანახმად, კანონპროექტში შემოთავაზებული ერთსა და იმავე პირისთვის შეზღუდვა ორი საპრეზიდენტო ვადის სახით „ხელს არ უშლის პირს, რომელიც იკავებდა ან იკავებს პრეზიდენტის თანამდებობას ამ შესწორების ძალაში შესვლის მომენტში, მონაწილეობა მიიღოს საპრეზიდენტო არჩევნებში კანდიდატის რანგში რუსეთის კონსტიტუციაში აღნიშნული რედაქციის ჩართვის შემდეგ.

რუსეთის პრეზიდენტმა ვლადიმერ პუტინმა კენჭისყრის წინ განაცხადა, რომ აპირებს კენჭი იყაროს კიდევ ერთი ვადით, თუკი საკონსტიტუციო სასამართლო შესაბამის გადაწყვეტილებას გამოიტანს.

„პრინციპში, ეს ვარიანტი შესაძლებელი იქნებოდა. თუმცა, ერთი პირობით; კერძოდ: თუკი რუსეთის საკონსტიტუციო სასამართლო ოფიციალურად დაადასტურებს, რომ ასეთი შესწორება (საპრეზიდენტო ვადის რაოდენობის მოხსნის შესახებ) არ ეწინააღმდეგება ძირითადი კანონის მთავარ დებულებებსა და პრინციპებს“, - განაცხადა პუტინმა.