„ევროპული საქართველოს“ ერთ-ერთი ლიდერის, გიგა ბოკერიას განცხადებით, იუსტიციის უმაღლესი საბჭოს მიერ უზენაესი სასამართლოს თავმჯდომარის თანამდებობაზე წარდგენილი ნინო ქადაგიძე, „კლანის ნაწილობრივ გამორჩეული წარმომადგენელია“.

როგორც ბოკერია აღნიშნავს, ვითარება ამ კუთხით არ შეიცვლება, ვიდრე დიდი რეფორმები არ გატარდება.

„ეს კანდიდატი, რომელიც იქნა წარდგენილი, არის ჩვეულებრივი, შეიძლება ითქვას, რომ ნაწილობრივ გამორჩეული წარმომადგენელი ამ „კლანის“. ჩვენს სიტყვებს რომ არ დაეყრდნოთ, შეგიძლიათ ყველამ იხილოთ საპარლამენტო მოსმენისას მისი პასუხები საკვანძო საკითხებზე, კრიტიკულ ვითარებაში საზოგადოების მხარს იჭერს თუ ხელისუფლების. კატასტროფული ლოგიკა შემოგვთავაზა. მეორე იყო ღიად პოლიტიკური აგრესიის წახალისების ხელისუფლების კრიტიკოსების მიმართ, სადაც მან „დაალაიქა“ ეს პოსტები და მერე იცავდა ამ პოზიციას, რომ თურმე ნორმალურია მოსამართლის მხრიდან აგრესიული თავდასხმა პოლიტიკური ოპონენტების წინააღმდეგ „ქართული ოცნების“ და ივანიშვილის მხარდასაჭერად.

სამწუხაროდ, აქ სანამ დიდი რეფორმები არ მოხდება, არ შეიცვლება ვითარება. ამ დიდ რეფორმებს სჭირდება ამ ხელისუფლების მშვიდობიანი არჩევნებით შეცვლა და ჩვენ ოპოზიციის ამ ნაწილს, „ევროპულ საქართველოს“ და სხვებს გვაქვს ძალიან მკაფიო ფუნდამენტური ხედვა, რომელსაც მალე წარვადგენთ, როგორ უნდა განვახორციელოთ ეს რეფორმა ივანიშვილის ხელისუფლების დამარცხების შემდეგ“,-განაცხადა გიგა ბოკერიამ.

შეგახსენებთ, იუსტიციის უმაღლესმა საბჭომ უზენაესი სასამართლოს თავმჯდომარის თანამდებობაზე მოსამართლე ნინო ქადაგიძე აირჩია. საბჭო მის მიერ დასახელებულ კანდიდატურას განსახილველად საქართველოს პარლამენტს გადაუგზავნის.