თურქეთის პრეზიდენტმა რეჯეფ თაიფ ერდოღანმა საბერძნეთის ხელისუფლება ნაცისტებს შეადარა. მისი თქმით, ნაცისტებსა და საბერძნეთის დღევანდელ ხელისუფლებას შორის დიდი განსხვავება არაა და ისინი მიგრანტებს სასტიკად ექცევიან. ერდოღანის განცხადებით, ბერძნები არაჰუმანურად, ბარბაროსულად და ფაშისტებივით იქცევიან.
„ის, რაც საბერძნეთის საზღვრებთან ხდება, არ განსხვავდება იმისგან, რაც ნაცისტებმა გააკეთეს. ცეცხლი გაუხსნა და გაზის ბომბები ესროლო უდანაშაულო ადამიანებს, ბარბაროსობაა. არავინ ხმას არ ირებს საბერძნეთის ხელისუფლების წინააღმდეგ როცა ისინი კაცობრიობის წინააღმდეგ დანაშაულს სჩადიან“,-აღნიშნა ერდოღანმა.
აღსანიშნავია, რომ ამ დროისთვის თურქეთში 3.5 მილიონზე მეტი სირიელი, ერაყელი და ავღანელი მიგრანტი იმყოფება. ევროკავშირთან ურთიერთობის გაუარესების ფონზე თურქეთის პრეზიდენტმა რეჯეფ თაიფ ერდოღანმა ლტოლვილებს ქვეყნის დატოვების უფლება მისცა. ბოლო კვირების განმავლობაში საბერძნეთის საზღვრის გადაკვეთა და ევროკავშირში მოხვედრა ათასობით მიგრანტმა სცადა.