საქართველოს გენერალური პროკურორი ირაკლი შოთაძე მოადგილეებთან და პროკურატურის სხვადასხვა სტრუქტურული ერთეულის ხელმძღვანელებთან ერთად ევროპის საბჭოს საპარლამენტო ასამბლეის მონიტორინგის კომიტეტის დელეგაციას შეხვდა. ამის შესახებ „ინტერპრესნიუსს“ საქართველოს გენერალური პროკურატურიდან აცნობეს.
მათივე ინფორმაციით, ევროსაბჭოს დელეგაციის წევრები ტიტუს კორლატეანი და ბას კლეინი პროკურატურაში განხორციელებული რეფორმების და სამომავლო გეგმების შესახებ ინფორმაციას გაეცნენ.
გენერალურ პროკურატურაში გამართულ შეხვედრას ასევე ესწრებოდა ევროპის საბჭოს ოფისის ხელმძღვანელი საქართველოში კრისტიან ურსე.
„საუბარი შეეხო საქართველოს პროკურატურის მუშაობის სპეციფიკას, უწყების პრიორიტეტებს და პროკურატურის განვითარების სტრატეგიას. შეხვედრის დასასრულს მხარეებმა სამომავლო თანამშრომლობის გააქტიურების მნიშვნელობაზე ისაუბრეს,“ - ნათქვამია ინფორმაციაში.