11 მარტს, ფინანსთა სამინისტროს შემოსავლების სამსახურის საგადასახადო მონიტორინგის დეპარტამენტის სამართალდარღვევათა გამოვლენის სამმართველოს მიერ, თბილისის ადმინისტრაციულ ტერიტორიული ერთეულების ფარგლებში განხორცილებული ღონისძიებების შედეგად, აქციზური მარკებით ნიშანდებას დაქვემდებარებული აქციზური საქონლის წარმოებისა და მიწოდების წესების დარღვევის 8 ფაქტი გამოვლინდა. ამის შესახებ „ინტერპრესნიუსს“ შემოსავლების სამსახურიდან აცნობეს.

მათი ცნობით, ჯამში, აღმოჩენილია 19,16 კილოგრამი და 580 ღერი უაქციზო თუთუნი. საქართველოს საგადასახადო კოდექსის 192-ე მუხლის მე-5 ნაწილის შესაბამისად, კანონდამრღვევ მოქალაქეებს ჩამოერთვათ საქონელი.

„აღნიშნული საქმის მასალები, საქართველოს ადმინისტრაციულ სამართალდარღვევათა კოდექსის 241-ე მუხლის შესაბამისად, ქვემდებარეობით შესაბამის სასამართლოს გადაეგზავნა“,-ნათქვამია შემოსავლების სამსახურის მიერ გავრცელებულ ინფორმაციაში.