საქართველოს საგარეო საქმეთა მინისტრმა დავით ზალკალიანმა საქართველოში თურქეთის რესპუბლიკის საგანგებო და სრულუფლებიან ელჩთან ფატმა ჯერან ოზგანთან კორონავირუსის (COVID-19) გავრცელების პრევენციული ღონისძიებებისა და შემდგომი კოორდინირებული საქმიანობის საკითხები განიხილა. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.
მათი ინფორმაციით, შეხვედრაზე მხარეებმა ორივე ქვეყანაში ახალი კორონავირუსის (COVID-19) გავრცელების შემდეგ არსებული მდგომარეობის შესახებ ინფორმაცია გაცვალეს, ასევე განხილული იქნა ის ღონისძიებები, რომლებსაც ორი ქვეყნის მთავრობა დაავადების შემდგომი გავრცელების შესაჩერებლად მიმართავს.
შეხვედრაზე ვირუსის გავრცელების შემდგომი პრევენციისთვის საქართველოსა და თურქეთს შორის მჭიდრო და კოორდინირებული თანამშრომლობის აუცილებლობა აღინიშნა. ორივე ქვეყნის მთავრობების მიერ ვირუსის გავრცელების საწინააღმდეგოდ გადადგმულ ნაბიჯებს მაღალი შეფასება მიეცა.