ფარმაცევტული კომპანია „ჯიპისი” აცხადებს, რომ მათ აფთიაქებში სამკურნალო პრეპარატების, ასევე ბავშვთა კვებისა და მოვლის პროდუქტების კუთხით ნაშთების პრობლემა არ დგას.
როგორც განცხადებაში წერია, ამ ეტაპზე დეფიციტურ პროდუქტებად რჩება მხოლოდ პირბადე და ხელის ანტიბაქტერიული გელი, რაც მხოლოდ საქართველოს არ ეხება და ყველგან დეფიციტია.
„დაზუსტებით ვაცხადებთ, რომ დღეისთვის სამკურნალო პრეპარატების, ასევე ბავშვთა კვების და მოვლის პროდუქტების კუთხით „ჯიპისი“-ში ნაშთების პრობლემა არ დგას და ჩვეულ რეჟიმში ვაგრძელებთ მუშაობას, ყოველდღურად მარაგდება აფთიაქები. ვესაუბრეთ გარე მომწოდებლებს და მათი მხრიდანაც რაიმე შეფერხება არ დაფიქსირებულა. გარკვეულ ბრენდებზე ველოდებით ახალ მარაგებს. ამ ეტაპზე დეფიციტურ პროდუქტებად რჩება მხოლოდ პირბადე და ხელის ანტიბაქტერიული გელი. ეს არ ეხება განყენებულად ჩვენ ქვეყანას. იცით, რომ ყველგან დეფიციტია, თუმცა ჩინეთმა განაახლა საწარმოო პროცესი და იმედს ვიტოვებთ უახლოეს მომავალში ამ პროდუქციის შევსებასაც შევძლებთ.
არასაჭირო და რადიკალურად გაზრდილი შესყიდვებით, პირიქით იქმნება ხელოვნური დეფიციტი და ამით მხოლოდ ის ადამიანები ზარალდებიან, ვისაც რეალურად, იმ მომენტისთვის ესაჭიროება ესა თუ ის პრეპარატი.
კიდევ ერთხელ გავუსვამთ ხაზს, რომ რეცეპტული მედიკამენტები და განსაკუთრებით ანტიბიოტიკები არ მიიღება საკუთარი დანიშნულებით. კორონავირუსული ინფექცია იმართება მხოლოდ სამედიცინო პერსონალის მიერ და მათი მხრიდანვე ინიშნება ის სამკურნალო პრეპარატები, რაც პაციენტის გამოჯანმრთელებისთვისაა საჭირო“, - ნათქვამია განცხადებაში.