ფრაქცია „ევროპული საქართველო", „ევროპული საქართველო - მოძრაობა თავისუფლებისთვის" და „ევროპული საქართველო - რეგიონები" 17-20 მარტის პლენარულ სხდომებს არ დაესწრება.

ამის შესახებ პარლამენტის თავმჯდომარემ არჩილ თალაკვაძემ ბიუროს დღევანდელ სხდომაზე განაცხადა, სადაც ფრაქციების მიმართვა წაიკითხა.

თალაკვაძის თქმით, პლენარულ სხდომაზე არ დაესწრება დეპუტატი რამაზ ნიკოლაიშვილიც.

ბიურომ ფრაქციებისა და ცალკეული დეპუტატების მიმართვა, ცნობად მიიღო.

შეგახსენებთ, რომ „ევროპული საქართველოს" ფრაქციები და ფრაქცია „ნაციონალური მოძრაობა" პლენარულ სხდომებსა და საკომიტეტო განხილვებს მას შემდეგ არ ესწრებიან, რაც პარლამენტმა საკონსტიტუციო ცვლილებების პროექტი, 2020 წელს არჩევნების სრულად პროპორციულ სისტემაზე ჩატარებასთან დაკავშირებით ჩააგდო.