ბაზრობა „თერგის“ ფინანსური დირექტორის განცხადებით, ბაზრობის დირექტორი ბიზნესომბუდმენს შეხვდა და მისგან ელიან პასუხს, თუ როგორ უნდა იმოქმედონ მოვაჭრეებთან მიმართებით.
მისი ინფორმაციით, გადაწყვეტილება, სავარაუდოდ, დღეს გახდება ცნობილი.
„დირექტორი წასული იყო გუშინ საღამოს და შეხვდა ბიზნესომბუდსმენს. ელოდება პასუხს მათგან. დღეს ეტყვიან, რა უნდა მოხდეს და რა უნდა გაკეთდეს. მიიღებენ გადაწყვეტილებას და გამოვუცხადებთ ამ ხალხს. მეტი მე არაფერი ვიცი. დირექტორი დილით იყო მოსული, მოიტანა ინფორმაცია. ავიყვანეთ ხალხი და გაესაუბრა მათ, უთხრა რომ გვაცალეთ, მოვა ინფორმაცია და გამოგიცხადებთ თქვენცო. დღეს უნდა იყოს პასუხი“,- განაცხადა „თერგის“ ფინანსურმა მენეჯერმა.
ცნობისთვის, ბაზრობა „თერგის" მოვაჭრეების ნაწილი გაიფიცა. როგორც ერთ-ერთმა მოვაჭრემ „ინტერპრესნიუსთან“ საუბრისას განაცხადა, კორონავირუსის პანდემიის გამო, ისინი ბაზრობის ორი კვირით დაკეტვას და გადასახადის დროებით შეჩერებას მოითხოვენ.