რუსეთის პრემიერ-მინისტრმა მიხაილ მიშუსტინმა ხელი მოაწერა რეზოლუციას, რომელიც უცხო ქვეყნების მოქალაქეებსა და მოქალაქეობის არმქონე პირებს 18 მარტიდან 1 მაისამდე ქვეყანაში შესვლას უკრძალავს, - ამის შესახებ ინფორმაციას რუსული მედია ავრცელებს.

„სახელმწიფოებრივი უსაფრთხოებისა და ადამიანების ჯანმრთელობის დასაცავად, ასევე კორონავირუსის ინფექციის გავრცელების თავიდან ასაცილებლად, რუსეთის უსაფრთხოების სამსახურს დაევალა დააწესოს ქვეყანაში შემოსვლის დროებითი აკრძალვა უცხო ქვეყნის მოქალაქეებისა და მოქალაქეობის არმქონე პირებისთვის, მათ შორის ბელორუსიადან მომავალი პირებისთვის, 18 მარტის 00:00 საათიდან 1 მაისის 00:00 საათამდე,“- აღნიშნულია დოკუმენტში.

შეზღუდვა არ შეეხებათ დიპლომატიური მისიების თანამშრომლებს, საერთაშორისო მარშრუტზე მოძრავ ავტომობილების მძღოლებს, გემების, თვითმფრინავებისა და მატარებლების ეკიპაჟებს, ოფიციალური დელეგაციის წევრებს, იმ ადამიანებს, რომლებსაც დიპლომატიური და სამსახურეობრივი ვიზები აქვთ, ან რუსეთში ახლო ნათესავის გარდაცვალების გამო ჩადიან, ასევე სატრანზიტო თვითმფრინავების მგზავრებს.