კორონავირუსის გავრცელების შესაჩერებლად კანადა უცხო ქვეყნების მოქალაქეებისთვის საზღვრებს კეტავს, - ამის შესახებ ინფორმაციას „როიტერსი“ ავრცელებს.
სააგენტოს ცნობით, შეზღუდვა არ შეეხებათ აშშ-ის მოქალაქეებსა და მუდმივი ცხოვრების უფლების მქონე პირებს.
„ადამიანებს, რომლებიც კანადის მოქალაქეები, ან მუდმივი ცხოვრების უფლების მქონე პირები არ არიან, კანადაში შემოსვლაზე უარს ვეტყვით,“ - განაცხადა კანადის პრემიერ-მინისტრმა ჯასტინ ტრუდომ და მოქალაქეებს სახლებში დარჩენისა და სოციალური კონტაქტების მაქსიმალურად შეზღუდვისკენ მოუწოდა.
„სახლში დარჩენა საზოგადოებისა და ერთმანეთის დასაცავად საუკეთესო ნაბიჯია,“- აღნიშნა პრემიერმა, რომელიც ამ დრომდე კარანტინში რჩება იმის გამო, რომ მის მეუღლეს კორონავირუსი დაუდგინდა.
ბოლო მონაცემებით, კანადაში ახალი კორონავირუსით დაღუპულთა რაოდენობა 4-მდე, დაინფიცირებულთა კი - 407-მდე გაიზარდა.