ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლები ხელისუფლებას მოუწოდებენ, შეამციროს წინასწარი დაკავების გამოყენება, რაც ჯერ კიდევ ხშირად ხდება, წინააღმდეგობაში მოდის ევროპულ სტანდარტებთან და აჩენს ეჭვს, რომ ის შეიძლება პოლიტიკური მოტივებით იყოს გამოყენებული. ამის შესახებ ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლების ტიტუს კორლატეანის და კლოდ კერნის განცხადებაშია ნათქვამი.
გარდა ამისა, მომხსენებლები მიესალმებიან ხელისუფლებისა და მმართველი უმრავლესობის მზაობას შემუშავდეს ადმინისტრაციული კანონდარღვევების შესახებ ახალი კანონი, რადგან მოქმედი კანონი ჯერ კიდევ საბჭოთა ეპოქაშია შექმნილი და ეწინააღმდეგება ევროპულ სტანდარტებს და საქართველოს კონსტიტუციის დებულებებს – იძლევა რა მისი ბოროტად გამოყენების შესაძლებლობას.