საპარლამენტო უმრავლესობის ლიდერის, მამუკა მდინარაძის განცხადებით, ვერსიის დონეზე ქვეყანაში საგანგებო მდგომარეობის გამოცხადების საკითხი განიხილება.

როგორც მთავრობის ადმინისტრაციაში გამართულ ბრიფინგზე მდინარაძემ აღნიშნა, თუ საბოლოო რეკომენდაცია ასეთი იქნება, საქართველოს პარლამენტი საგანგებო მდგომარეობის გამოცხადებას მხარს დაუჭერს.

„ბუნებრივია, ვერსიის დონეზე საგანგებო მდგომარეობის გამოცხადების საკითხი განიხილება. თუ შესაბამისი სპეციალისტების საბოლოო რეკომენდაციები იქნება, საქართველოს პარლამენტი მხარს დაუჭერს. დღეს ჩვენ მხარს ვუჭერთ რეგულაციების მაქსიმალურად გამკაცრებას, მიდგომებისა და შეზღუდვების მაქსიმალურად გამკაცრებას, რაც გამომდინარეობს მხოლოდ და მხოლოდ ერთი მთავარი პრიორიტეტიდან და ეს მთავარი პრიორიტეტი არის მოსახლეობის ჯანმრთელობაზე ზრუნვა. თუ საგანგებო მდგომარეობის გამოცხადების აუცილებლობა დადგება, რაც შესაძლებელია მოხდეს, ამისგან დაზღვეული არც ერთი ქვეყანა არ არის, საქართველოს პარლამენტი ამას მხარს დაუჭერს”, - განაცხადა მდინარაძემ.