სომხეთში კორონავირუსით ინფიცირებულთა რაოდენობა 122-მდე გაიზარდა. ამის შესახებ ქვეყნის ჯანდაცვის მინისტრმა, არსენ ტორისიანმა განაცხადა.

ცნობისთვის, სომხეთში კორონავირუსით ინფიცირებულთა შორის ყველაზე მეტად ორი კლასტერი ფიგურირებს. ერთი ქალაქი ეჩმიადინი, რომელიც ერევანთან მდებარეობს. აღნიშნულ შემთხვევაში, სომხეთის მოქალაქემ, რომელიც იტალიიდან დაბრუნდა წვეულება მოაწყო, რომლის რამდენიმე დამსწრე კორონავირუსით დაინფიცირდა.

რაც შეეხება მეორე კლასტერს, ეს ერევანთან არსებული სამკერვალო ქარხანაა. ქვეყნის პრემიერის, ნიკოლ ფაშინიანის თქმით, სამკერვალოში იტალიელი ინსტრუქტორი ჩამოვიდა, რომელმაც თავისი ჯანმრთელობის მდგომარეობა დამალა. „ის წავიდა და ასეთ მდგომარეობაში დაგვტოვა“,-განაცხადა ფაშინიანმა.