კერძო სექტორი მზად არის კადრებით, საწოლებით და სასუნთქი აპარატებით, რისი რაოდენობაც ქვეყანაში საკმარისია, - ამის შესახებ სიმონ ხეჩინაშვილის სახელობის საუნივერსიტეტო კლინიკის დირექტორმა მაია მახარაშვილმა განაცხადა.

როგორც მახარაშვილმა აღნიშნა, ხეჩინაშვილის სახელობის კლინიკაში განთავსებულია 200 საწოლი, 23 სუნთქვის აპარატი და ინტენსიური ბლოკები. მისივე თქმით, საჭიროების შემთხვევაში, კლინიკის დაცლის ბრძანება ჯანდაცვის სამინისტროს მხრიდან 48 საათით ადრე გაეგზავნებათ.

„ჯანდაცვის სამინისტროს აქვს თავისი გეგმა, რომლის მიხედვითაც თავიანთი პროგნოზებით გათვალისწინებული აქვთ საწოლების რაოდენობა. რა თქმა უნდა, ერთბაშად ყველა საწოლის გათავისუფლების საჭიროება არ იქნება, იმიტომ, რომ სხვა პაციენტებიც უნდა განთავსდნენ სადმე. სიმონ ხეჩინაშვილის სახელობის კლინიკაში არის 200 საწოლი, 23 სუნთქვის აპარატი და ინტენსიური ბლოკები. საჭიროების შემთხვევაში ჯანდაცვის სამინისტროს მხრიდან შეტყობინება მოვა 48 საათით ადრე იმისთვის, რომ მოხდეს კლინიკის დაცლა. ყველაზე ცუდ სცენარშიც, თუ მოხდა ინფიცირებულების დიდი აფეთქება ყველა კლინიკა უნდა იყოს ამისთვის მზად , “ - განაცხადა მაია მახარაშვილმა.