20 მარტიდან ივანე ჯავახიშვილის სახელობის თბილისის სახელმწიფო უნივერსიტეტში პირველადი ფსიქოლოგიური დახმარების ცხელი ხაზი ამუშავდა. როგორც „ინტერპრენიუსს“ სახელმწიფო უნივერსიტეტიდან აცნობეს, თსუ კონფლიქტოლოგიის ინსტიტუტის ფსიქოლოგების მიერ ინიცირებული ცხელი ხაზი კრიზისულ სიტუაციაში, ამ ეტაპზე კი კორონავირუსის პანდემიის დროს მოემსახურება საზოგადოებას.

მათივე ინფორმაციით, ფსიქოლოგიური კონსულტაცია გაეწევა მათ, ვინც პანდემიის პირობებში განიცდის ისეთ ემოციურ და ფსიქოლოგიურ სირთულეებს, როგორიცაა შფოთვა, სტრესი, გაურკვევლობის გამკლავების საჭიროება, პანიკური შეტევები, უიმედობა, კარანტინის გამო მარტოობის განცდა, გადაღლილობა და გამოფიტვა მედპერსონალში და ა.შ.

„საკონსულტაციო ჯგუფის ხელმძღვანელია თსუ კონფლიქტოლოგიის ინსტიტუტის დირექტორი, ფსიქოლოგიის მეცნიერებათა დოქტორი, პროფესორი გუგული მაღრაძე. ჯგუფის წევრები არიან სპეციალისტები ფსიქოთერაპიული მუშაობის გამოცდილებით: თსუ ასოცირებული პროფესორი, ფსიქოლოგიის დოქტორი, ფსიქოთერაპევტი მედეა დესპოტაშვილი, ფსიქოთერაპევტები ეკა გვარამია, დარეჯან თოლორდავა, სალომე ყავლაშვილი, ფსიქოლოგიის დოქტორი მირანდა გიორგაშვილი. საჭიროების შემთხვევაში საკონსულტაციო ჯგუფი გაფართოვდება.

სატელეფონო კონსულტაციები შესაძლებელია ყოველდღე 12:00-დან 14:00 საათამდე . ტელ: 574831237; Skype კონსულტაციები - 19:00 საათიდან 21:00 საათამდე; Skype მისამართია : PFA CrisisAid.

ასევე, შესაძლებელია შეკითხვების მიწერა ელფოსტაზე: psychocrisisaid@gmail.com“,- ნათქვამია ინფორმაციაში.