„ევროპული საქართველო“ დღეს ერთჯერადად პოლიტიკური ბოიკოტის რეჟიმის დარღვევას და პლენარულ სხდომაზე დასწრებას გეგმავს, სადაც საგანგებო მდგომარეობის გამოცხადებას კენჭი უნდა ეყაროს

„ევროპული საქართველო“ დღეს ერთჯერადად პოლიტიკური ბოიკოტის რეჟიმის დარღვევას და პლენარულ სხდომაზე დასწრებას გეგმავს, სადაც საგანგებო მდგომარეობის გამოცხადებას კენჭი უნდა ეყაროს. ამის შესახებ პარტია „ევროპული საქართელოს“ ლიდერმა დავით ბაქრაძემ ბრიფინგზე განაცხადა. მისი განმარტებით, თუ საგანგებო მდგომარეობის გამოცხადების აუცილებელი ორი პირობა დაკმაყოფილდება, „ევროპული საქართველო“ მხარს დაუჭერს საგანგებო მდგომარეობის გამოცხადებას და ხელისუფლებისთვის ყველა იმ ბერკეტის მიცემას, რომელიც კორონავირუსთან ბრძოლისთვის აუცილებელია.

„კარგად გვესმის, რომ ამ ბრძოლაში მთავარი პასუხისმგებლობა არის ხელისუფლებაზე. ამიტომ, ბუნებრივია, რომ ხელისუფლებას უნდა ჰქონეს ყველა ის ბერკეტი, რომელიც საჭიროა ქვეყანაში აუცილებელი ღონისძიებების გასატარებლად და ვირუსის დასამარცხებლად. ამავე დროს, ყველას გვეკისრება ჩვენი პასუხისმგებლობა და დღეს არის დრო, რომ პასუხისმგებლიანმა პოლიტიკურმა ძალებმა აჩვენონ ერთიანობა ამ საქმესთან ბრძოლაში და ყველამ შეიტანოს საკუთარი წვლილი, ვისაც რა შეგვიძლია, კორონავირუსის, ჩვენი მთავარი მტრის დამარცხებაში. აღნიშნულიდან გამომდინარე, „ევროპული საქართველო“ დღეს გამონაკლისის სახით, ერთჯერადად, არღვევს პოლიტიკურ ბოიკოტს, რომელიც იცით რომ გრძელდება. ჩვენ ვაპირებთ, შევიდეთ პარლამენტის სხდომაზე და მხარი დავუჭიროთ საგანგებო მდგომარეობის გამოცხადებას. თუმცა მინდა აქვე განვმარტო, ყველამ ვიცით, რომ საგანგებო მდგომარეობას აქვს გარკვეული შეზღუდვები, მას შეიძლება, ჰქონდეს ძალიან მძიმე და არასასურველი გვერდითი ეფექტები, ამიტომ ნეგატიური პროცესების მინიმიზაციისთვის, ჩვენი ხედვით საგანგებო მდგომარეობა უნდა მკაფიოდ აკმაყოფილებდეს ორ კრიტერიუმს - უნდა იყოს ვადაში გაწერილი და უნდა იყოს ჩამოთვლილი კონკრეტული ღონისძიებები, რა ფორმით და რა პირობებში ვრცელდება საგანგებო მდგომარეობის შეზღუდვები. ამ ორი კრიტერუმის დაკმაყოფილების შემთხვევაში, მზად ვართ, მხარი დავუჭიროთ საგანგებოს გამოცხადებას და მივცეთ ხელისუფლებას ყველა ის ბერკეტიმ რომელიც მას სჭირდება კოონავირუსთან საბრძოლველად,“- განაცხადა დავით ბაქრაძემ.

ამასთანავე, პარტიის ერთ-ერთმა ლიდერმა გიგა ბოკერიამ განმარტა, რომ პრემიერ-მინისტრის განცხადებამ ფასების კონტროლთან დაკავშირებით, შესაძლოა, უარყოფითი შედეგი გამოიწვიოს, თუმცა მისი თქმით, „ევროპული საქართველო“ მზადაა საგანგებო მდგომარეობის გამოცხადებას მხარი ამ ფაქტორის მიუხედავად დაუჭიროს. „პრემიერ-მინისტრმა ახსენა ფასების კონტროლი და მინდა კრიზისული ვითარებების ისტორია კიდევ ერთხელ გავახსენო ყველას. ამაში ჩარევის შეცდომა არ უნდა იქნას დაშვებული იმიტომ, რომ პირიქით შედეგი შეიძლება გამოიღოს. მიუხედავად ამ ყველაფრისა, მიუხედავად იმისა, რომ ჩვენ ჯერ არ გვიხილავს მთავრობის სტრატეგია, ეკონომიკაში განსაკუთრებით, რა თქმა უნდა, დავუჭერთ ამას მხარს და შემდეგ გვექნება ისევ საქმიანი და კონკრეტული შეთავაზებები, მთავრობის მიმართ ყველა ამ სფეროსთან, განსაკუთრებით ეკონომიკასთან დაკავშირებით,“- განაცხადა გიგა ბოკერიამ.

ეუთოს სადამკვირვებლო მისიის ხელმძღვანელი ჯილიან სტირკი - ყველას შევახსენებდი, რომ საქმე პოლიტიკური პროცესის მთლიანობას ეხება, სწორედ ეს დევს სასწორზე
ქართული პრესის მიმოხილვა 19.10.2020
ლევან ბოძაშვილი - კავკასიური კვანძი იხსნება და არა საქართველოს სასარგებლოდ, ჩვენთვის ახლა აუცილებლობას წარმოადგენს სრული პოლიტიკური და ინსტიტუციონალური სტაბილურობა