საქართველოს პრეზიდენტის მიერ საგანგებო მდგომარეობის გამოცხადებასთან დაკავშირებით გამოცემული დეკრეტის თანახმად, მთავრობას უფლება ეძლევა სახელმწიფო ბიუჯეტის ხარჯვის უფლებამოსილება შეაჩეროს. კერძოდ, დეკრეტის თანახმად, საქართველოს მთავრობას ეძლევა უფლება, შეაჩეროს სახელმწიფო ბიუჯეტის, ავტონომიური რესპუბლიკების რესპუბლიკური ბიუჯეტებისა და მუნიციპალიტეტების ბიუჯეტების ფარგლებში ასიგნებების ხარჯვის უფლებამოსილება. ამასთან, მთავრობას უფლება ეძლევა საბიუჯეტო კლასიფიკაციის კოდებისა და მუხლების მიხედვით, შეაჩეროს ან შეზღუდოს სახელმწიფო შესყიდვები შესყიდვების ერთიანი ლექსიკონის (CPV) კოდების მიხედვით. ასევე, საქართველოს მთავრობას ეძლევა უფლება სარეზერვო ფონდის მაქსიმალური მოცულობა გაზარდოს 2020 წლის სახელმწიფო ბიუჯეტის ასიგნების მთლიანი ოდენობის 5%-მდე.
დეკრეტის თანახმად, საქართველოს მთავრობას უფლება ექნება საჭიროების შემთხვევაში საქართველოს პარლამენტს წარუდგინოს საგანგებო ბიუჯეტი.
ცნობისთვის, ახალი კორონავირუსის გამო, ქვეყანაში ერთი თვით: 21 მარტიდან 21 აპრილამდე საგანგებო მდგომარეობა გამოცხადდა.