ნათია თურნავა - მომსწრე და მონაწილე ვართ  იმ პროცესის, როდესაც ჩვენი ეკონომიკა სწრაფად ახდენს გადაწყობას და შეცვლილი ვითარების მიმართ ადაპტაცია ხდება

ჩვენი ყველა გადაწყვეტილება, ყველა სტრატეგია და გეგმა ექვემდებარება ერთ მთავარ პრიორიტეტს და ეს არის ჩვენი მოქალაქეების დაცვა, - ამის შესახებ ეკონომიკისა და მდგრადი განვითარების მინისტრმა ნათია თურნავამ გადაცემაში „ქრონიკა“ განაცხადა. მისი თქმით, ამ პრიორიტეტის სასარგებლოდ დროებით სხვადასხვა პრიორიტეტების მეორე პლანზე გადაწევა და დათმობა ხდება, მათ შორის ეკონომიკური საქმიანობის შეზღუდვის და გარკვეული უკუსვლის ხარჯზეც.

„მაგრამ ეს არის გამართლებული და თქვენ ხედავთ, რომ ეკონომიკური გუნდი და მთავრობა ძალიან კოორდინირებულად მართავს ამ საკმაოდ დიდ და უჩვეულო გამოწვევას“, - აღნიშნა ნათია თურნავამ.

„ჩვენი მთავარი ამოცანაა, როდესაც დავძლევთ კორონავირუსს და იმედია, ეს რამდენიმე თვეში მოხდება, ნაკლები დანაკარგით გამოვიდეთ ამ პროცესიდან და ძალიან მალე შევძლოთ, დავუბრუნდეთ იმ აღმავალ ტრაექტორიას, რასაც ჩვენი ეკონომიკა ავლენდა უკანასკნელი წლების განმავლობაში“, - განაცხადა ნათია თურნავამ.

მისივე თქმით, კორონავირუსთან ეფექტური ბრძოლის მიმართულებით მთავრობა დგამს ზომიერ ნაბიჯებს, რომელიც ნაკლებად დამაზიანებელია ეკონომიკურ საქმიანობასთან მიმართებაში. როგორც ნათია თურნავამ აღნიშნა, შექმნილი ვითარებიდან გამომდინარე მთავრობა რამდენიმე მნიშვნელოვან მიმართულებაზეა კონცენტრირებული. მისი განმარტებით, პირველ რიგში, წინა პლანზე წამოვიდა კრიზისული ეკონომიკა, რაც ახალი წარმოებების გაჩენას გულისხმობს.

„ეს არის ის საქმიანობა, რომელიც დაკავშირებულია ისევ და ისევ ჩვენი მოქალაქეების ჯანმრთელობასა და უსაფრთხოებასთან. ეს არის ისეთი ახალი წარმოებების გაჩენა, როგორიცაა პირბადეების წარმოება, რომელიც პრაქტიკულად რამდენიმე დღეში ავაწყეთ ნულიდან. გარდა ამისა, ფაქტობრივად, ვასამმაგებთ სადეზინფექციო ხსნარების წარმოების პოტენციალს, ასევე ისეთ საქმიანობებს, რომლებიც აუცილებელია სოციალური დისტანცირებისთვის - იქნება ეს ადგილზე მიტანის სერვისის განვითარება, თუ სხვადასხვა ონლაინ კომუნიკაციების გამართვა. ესაა პირველი ბლოკი, რომელსაც მაქსიმალურად ხელს ვუწყობთ“, - აღნიშნა ნათია თურნავამ.

მინისტრის თქმით, მეორე და არანაკლებ მნიშვნელოვანია, კრიტიკული ინფრასტრუქტურა - ელექტროენერგიითა და გაზით მომარაგება, კავშირგამბულობა, სასურსათო უსაფრთხოება და სურსათით მომარაგება.

„ეს არის ის დარგები, რომლებიც ნებისმიერ შემთხვევაში და ნებისმიერი ფორსმაჟორში უნდა ფუნქციონირებდეს“, - განაცხადა ეკონომიკისა და მდგრადი განვითარების მინისტრმა. ნათია თურნავას განმარტებით, მესამე ბლოკია ადგილობრივი წარმოება, რომელიც ჩვეულებრივ რეჟიმში აგრძელებს საქმიანობას და ეს ეხება მრეწველობას, მშენებლობას და არა მარტო ინფრასტრუქტურული პროექტების მშენებლობას, არამედ სამოქალაქო პროექტების მშენებლობასაც.

„ეს ეხება სხვადასხვა სახეობის ტრანსპორტსა და ინფრასტრუქტურულ პროექტს, ეს ყველაფერი გრძელდება გარკვეული მცირედი გამონაკლისებით, რომლებიც საზოგადოებისთვის ცნობილია“, - განაცხადა ნათია თურნავამ.

კორნელი კაკაჩია - თუ ადგილობრივ არჩევნებში გახარიასა და ვასაძის პარტიები მიიღებენ მონაწილეობას, „ქართულ ოცნებას“ პროპორციული სისტემით  ხმების 43%-ის აღება გაუჭირდება
ქართული პრესის მიმოხილვა 17.05.2021
პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
დმანისში განვითარებულ მოვლენებთან დაკავშირებით კახა ოქრიაშვილი განცხადებას ავრცელებს
USAID და Gazelle Finance მცირე და საშუალო მეწარმეების და საქართველოში ეკონომიკის აღდგენის მიზნით ახალ პროგრამას იწყებენ
"კრედო ბანკმა" European Fund for Southeast Europe (EFSE) და Green for Growth Fund (GGF)-ისგან საქართველოს რეგიონებში მცხოვრები მიკრო და მცირე მეწარმეების მხარდასაჭერად 51 მილიონი ლარი მოიზიდა
“მეამა ქოლექთის” ყავის უნიკალური კოქტეილები ბათუმშია