ადამიანს, მიუხედავად მეცნიერული კანონზომიერებისა, შეიძლება სწამდეს, რომ შეუძლია, გაიაროს წყალზე, ოღონდ ეს მისი რწმენა არ უნდა აგდებდეს საფრთხეში დანარჩენ ადამიანებს , - ამის შესახებ „ევროპული საქართველოს“ ერთ-ერთმა ლიდერმა სერგო რატიანმა განაცხადა, რითაც საპარიარქოს მიერ ზიარების წესის არშეცვლის ფაქტს გამოეხმაურა.

როგორც რატიანმა განაცხადა, ადამიანს სიცოცხლის მიმართ გულგრილობა დაუშვებელია და ამა თუ იმ ჯგუფს ამ მხრივ უპირატესობა არ უნდა ჰქონდეს.

„კანონში არის ჩანაწერი, რომ აკრძალულია შეკრებები და ეს კანონი უნდა აღასრულოს ყველამ. აქ არ არსებობს ჩანაწერი აღმსარებლობასთან დაკავშირებით, შესაბამისად, სახალმწიფომ უნდა აღასრულოს კანონი და დაიცვას ადამიანთა სიცოცხლე. გულგრილობა ადამიანის სიცოცხლის მიმართ არ უნდა იყოს დაშვებული და სახელმწიფო თავს უფლებას არ უნდა აძლევდეს, რომ ამა თუ იმ ჯგუფს მისცეს გარკვეული უპირატესობა. ეს არ ეხება ადამიანის რწმენას, ადამიანს შეიძლება, მიუხედავად მეცნიერული კანონზომიერებისა, სწამდეს, რომ შეუძლია გაიაროს წყალზე, ოღონდ ეს მისი რწმენა არ უნდა აგდებდეს საფრთხეში დანარჩენ ადამიანებს. ადამიანის სიცოცხლის მიმართ გულგრილობა არის დაუშვებელი და სახელმწიფო ამას არ უნდა უშვებდეს და კანონში გამონაკლისი არ უნდა იყოს“,- განაცხადა რატიანმა.