დავით ზალკალიანი - მაღალი რისკის ქვეყნებიდან 3000 მოქალაქე გვყავს გამოყვანილი

საქართველოს საგარეო საქმეთა მინისტრის, დავით ზალკალიანის განცხადებით, საქართველო ერთ-ერთი პირველი ქვეყანა იყო, რომელმაც შეძლო საკუთარი მოქალაქეების გამოყვანა მაღალი რისკის ქვეყნებიდან, მაშინ, როდესაც ეს ვერ მოახერხეს დიდმა სახელმწიფოებმა. მისი თქმით, მსოფლიოს სხვადასხვა ქვეყანაში მყოფ საქართველოს მოქალაქეებს 24 საათიან რეჟიმში დახმარებას უწევენ საზღვარგარეთ საქართველოს დიპლომატიური მისიები. ამის შესახებ "ინტერპრესნიუსს" საქართველოს საგარეო საქმეთა სამინისტროდან აცნობეს.

„მინდა შეგახსენოთ, ერთი თვის წინ, ერთ-ერთი პირველები ვიყავით, როდესაც ჩვენი მოქალაქეები ჩინეთიდან გამოვიყვანეთ ჩვენი პარტნიორების, თურქების და ფრანგების დახმარებით და ჩვენი საკუთარი რესურსით. ერთ-ერთი პირველები ვიყავით, ვინც საკუთარი მოქალაქეების ევაკუაცია მოახდინა რომიდან, ორი სპეცრეისით. მოგეხსენებათ, როგორ ორგანიზებულად და კოორდინირებულად გავაკეთეთ ეს ყველაფერი. ჩვენ 400-მდე ჩვენი მოქალაქე გამოვიყვანეთ პოლონეთიდან LOT-ის დახმარებით. მე პირადად მქონდა სატელეფონო კომუნიკაცია ჩემს კოლეგებთან, იმისთვის, რომ 90 მოქალაქეს, რომელსაც გადაადგილების პრობლემა შეექმნა ბულგარეთი-თურქეთის საზღვარზე, შეძლებოდა საქართველოში დაბრუნება. ყოველდღიურ რეჟიმში გვაქვს ასეთ შემთხვევებთან საქმე. დღეს უკრაინიდან დაბრუნდებიან საქართველოს მოქალაქეები. დღესვე შესრულდება დუბაის რეისი და იქიდანაც დაბრუნდებიან. გუშინ, გვიან საღამოს "ბელავიამ" შეასრულა ფრენა და მაშინ როდესაც 165 ადამიანს ველოდით, მხოლოდ 120 მათგანი გამოცხადდა” , - განაცხადა ზალკალიანმა საერთაშორისო ფრენების შეზღუდვის ფონზე, საზღვარგარეთ მყოფი საქართველოს მოქალაქეების სამშობლოში დაბრუნების საკითხზე კომენტირებისას.

მისი თქმით, მნიშვნელოვანია მოქალაქეების დაბრუნება მოხდეს ეტაპობრივად და სრულ კოორდინაციაში, რათა ადგილზე შესაძლებელი იყოს მათთვის შესაბამისი საკარანტინო პროცედურების სათანადოდ გატარება.

„ძალიან პასუხისმგებლიანად უნდა ვიმოქმედოთ. შეცდომის დაშვების უფლება არ გვაქვს. მე ვთხოვ ყველას, მათ შორის ბიზნესს, რომ აქ მთავარი არა ბიზნეს ინტერესები, არამედ ადამიანების ჯანმრთელობაა. ყველას ვეხმარებით შეძლებისდაგვარად. ჩვენი დიპლომატები საკუთარი ჯიბიდან უნაწილებენ დახმარებას. ბევრი პრობლემა გვექმნება ყოველდღიურად, რის შესახებაც არ ვსაუბრობთ, მაგრამ ამ ადამიანებს ადგილზე ვუგვარებთ პრობლემებს. რადგან არ ვსაუბრობთ, ეს ხომ არ ნიშნავს, რომ არაფერი არ კეთდება. პირიქით, ყველას ვეხმარებით და ამ მიმართულებით მუშაობა გრძელდება" ,- განაცხადა მინისტრმა.

პაველ ფელგენგაუერი - ისრაელ-პალესტინის ზავის პირობები დამოკიდებული იქნება იმაზე, ისრაელი ღაზის სექტორს „ჰამასისაგან“ სრულად გაწმენდს და მოისურვებს თუ არა ამჯერად მასზე კონტროლის აბასის ადმინისტრაციისთვის გადაცემას
ქართული პრესის მიმოხილვა 14.05.2021
იაგო კაჭკაჭიშვილი - პოლიტიკური პროექტი, რომლის მიზანია „ქართულმა ოცნებამ“ ადგილობრივ არჩევნებში ამომრჩეველთა ხმების 43% არ აიღოს, რეალისტურია
სუპერმარკეტების ქსელ „მაგნიტის“ წამახალისებელ გათამაშებაში სუპერ პრიზი - ბინა გათამაშდა
კარაგანდაში შპს „ქაზ კარბონის“კუთვნილი ახალი ნახშირის გამამდიდრებელი ფაბრიკა გაიხსნა
თბილისში ქართულ-ფრანგული საკონდიტროების ქსელ Bisues-ის პირველი მაღაზია გაიხსნა