საქართველოს პრემიერ-მინისტრის გიორგი გახარიას ინფორმაციით, ამ დროისთვის კარანტინის რეჟიმზეა გადასული მარნეულის კლინიკა "ჯეოჰოსპიტალსი", რომელშიც კორონავირუსით ინფიცირებული მარნეულის მკვიდრი ქალი იმყოფებოდა.

მისივე თქმით, კლინიკის ტერიტორიაზე უახლოეს 24 საათის განმავლობაში საველე ჰოსპიტალი განთავსდება.

"დღეისათვის სრულად კარანტინის რეჟიმზეა გადასული მარნეულის კლინიკა „ჯეოჰოსპიტალსი“, ეს ქალბატონი მოთავსებული იყო ამ კლინიკაში. კლინიკის მახლობლად უახლოესი 24 საათის განმავლობაში განთავსდება საველე ჰოსპიტალი, ხოლო მეორე კლინიკა, "ავერსის" კლინიკა მარნეულის რაიონში გააგრძელებს ფუნქციონირებას, როგორც მულტიფუნქციონალური სამედიცინო დაწესებულება,“ - განაცხადა გიორგი გახარიამ.

ცნობისთვის, მარნეულში მცხოვრებ ქალს კორონავირუსი დღეს დაუდგინდა. ის მარნეულიდან თბილისის კლინიკაში დღის მეორე ნახევარში გადმოიყვანეს. არსებული ინფორმაციით, ინფიცირებულ პირს 80-ზე მეტ ადამიანთან ჰქონდა კონტაქტი. ვრცელდება ინფორმაცია, რომ ის მაღაზიაში მუშაობდა.