"ნაციონალური მოძრაობის" წარმომადგენლებმა ბოლნისისა და მარნეულის მუნიციპალიტეტების მცხოვრებლებს პირბადეები ჩაუტანეს.
როგორც მარნეულის მუნიციპალიტეტის გამშვებ პუნქტთან "ნაციონალური მოძრაობის " წევრმა, გიორგი ბოტკოველმა ჟურნალისტებს განუცხადა, ახალი კორონავირუსის პრევენციის მიზნით, ამგვარი დახმარება გაგრძელდება.
„ რამდენიმე დღეა მიხეილ სააკაშვილის საპრეზიდენტო ბიბლიოთეკაში, ბოლო დღეების განმავლობაში რიგდება პირბადეები, სადეზინფექციო ხსნარი და ხელთათმანები. ამ შემთხვევაში, ნებისმიერი ადამიანი, მნიშვნელობა არ აქვს ხელისუფლების თუ ოპოზიციის წარმომადგენელი იქნება, ამ ქვეყნის ჯარისკაცები ვართ.დღესაც მივიღეთ მონაწილეობა იმ მნიშვნელოვან საქმეში, რომელიც მიგვაჩნია, რომ განსაკუთრებით მნიშვნელოვანია. ჩამოვიტანეთ ათასი ცალი პირბადე, ოღონდ ეს არის ის, რაც პირველ ეტაპზე ხელზე გვქონდა. გაგრძელდება დახმარება, როგორც მარნეულისა და ბოლნისის, ისე მთელი საქართველოს მცხოვრებლების", - განაცხადა გიორგი ბოტკოველმა.