ჯანდაცვის მინისტრის, ეკატერინე ტიკარაძის განცხადებით, შექმნილი ვითარების გამო, გეგმური ოპერაციები გადავადდება.

ამის შესახებ მინისტრმა კორონავირუსთან დაკავშირებით შექმნილი საკოორდინაციო საბჭოს შეხვედრის დასრულების შემდეგ ბრიფინგზე განაცხადა.

„გეგმურ ოპერაციებთან დაკავშირებით ჩვენ შევიტანეთ ცვლილება და იგეგმება 4-თვიან ჭრილში გეგმური ოპერაციების გადავადება, მაგრამ არა სასწრაფო გადაუდებელი ოპერაციების, რა თქმა უნდა,“ - განაცხადა ეკატერინე ტიკარაძემ.

ჯანდაცვის მინისტრმა დასმული კითხვის საპასუხოდ ის მუნიციპალიტეტებიც დაასახელა, სადაც ამ დროისთვის კორონავირუსით დაინფიცირებული ადამიანები იმყოფებიან.

„ამ ეტაპისთვის ინფიცირებული ადამიანები გვყავს მარნეულში, ძირითადი მასა მოთავსებულია თბილისში, ასევე გვყავს გორის ჰოსპიტალში, ასევე არიან საჩხერის საავადმყოფოში და იმყოფებიან ბათუმში, ერთი პაციენტი არის ქუთაისის კლინიკაში,“ - განაცხადა ეკატერინე ტიკარაძემ.