რესპუბლიკური საავადმყოფოს დირექტორის, ლევან გოფოძის განცხადებით, მარნეულიდან მათ კლინიკაში გუშინ გადაყვანილ პაციენტს, რომელსაც ორმხრივი პნევმონია აქვს, კორონავირუსი არ დაუდასტურდა.
როგორც ლევან გოფოძე განმარტავს, აღნიშნული პაციენტი რეანიმაციულ განყოფილებაშია მოთავსებული.
„დღეისათვის რესპუბლიკური საავადმყოფოში დაკვირვების ქვეშ 47 პაციენტია. მათგან ერთი გუშინ გამთენიისას მარნეულიდან გადმოიყვანეს. ის ამჟამად რეანიმაციის განყოფილებაშია მოთავსებული. პაციენტს დადგენილი აქვს ორმხრივი პნევმონია, თირკმლის უკმარისობა რიგი თანმხლები დაავადებებით, პაციენტის მდგომარეობა მძიმეა, მაგრამ სტაბილური. გუშინვე გაკეთდა ტესტირება, რადგან ის მარნეულიდან იყო და ამან დიდი საზოგადოებრივი ინტერესი გამოიწვია. აღმოჩნდა, რომ კორონავირუსზე პასუხი ნეგატიურია.
რაც შეეხება დანარჩენ პაციენტებს, მათი მდგომარეობა დამაკმაყოფილებელია, დღეს რამდენიმე მათგანი გაეწერება. ჩვენთან მოგეხსენებათ, პაციენტების მოძრაობა საკმაოდ ინტენსიურად ხდება“, - განაცხადა გოფოძემ.