კომპანიამ „არქი“ გამგეობებს მარტოხელა ხანდაზმულებისთვის განკუთვნილი ნობათები გადასცა

კომპანიამ „არქი“ თბილისის გამგეობებს კორონავირუსის გავრცელების პრევენციის პერიოდში, მარტოხელა ხანდაზმულებისთვის განკუთვნილი ნობათები გადასცა.

როგორც „ინტერპრესნიუსს” დედაქალაქის მერიიდან აცნობეს, პროდუქციის მიღებისა და დახარისხების პროცესს დედაქალაქის მერი კახა კალაძე, საკრებულოს თავმჯდომარე გიორგი ტყემალაძესთან და რაიონის გამგებლებთან ერთად გაეცნო.

თბილისის მერის განცხადებით, ბიზნესსექტორის მხრიდან აქტიური თანადგომა და მხარდაჭერაა. კახა კალაძემ მადლობა გადაუხადა ყველა ადამიანს, ვინც აღნიშნულ პროცესში მონაწილეობს, დაინტერესებულ პირებს კი პროექტში ჩართვისკენ მოუწოდა.

„ეს არის ადგილი, სადაც იმ პროდუქტების თავმოყრა ხდება, რომელსაც სხვადასხვა ბიზნესექტორისგან ვიღებთ. მინდა აღვნიშნო, რომ ძალიან დიდია თანადგომა და მხარდაჭერა. ჩვენ უკვე განვაცხადეთ, რომ დავეხმარებით ყველა იმ ადამიანს, ვისაც ამ რთულ პერიოდში ყველაზე მეტად უჭირს და ჩვენი თანადგომა ყველაზე მეტად სჭირდება. ბიზნესმა გამოთქვა პროცესში ჩართვის სურვილი. დღეს „არქის“ წარმომადგენლებმა მოიტანეს შესაბამისი პროდუქტები, რათა დღეიდან გადავანაწილოთ და დავარიგოთ თბილისის ათივე რაიონში იმ ადამიანებთან, ვინც ელემენტარულად ვერ ახერხებს სახლიდან გამოსვლას და არიან რისკ ჯგუფში. კიდევ ერთხელ მინდა მოვუწოდო ყველას, ვისაც სურვილი აქვს ჩაერთოს ამ პროექტში, დაგვიკავშირდეს მერიის ცხელ ხაზზე და ჩვენ ვეტყვით ყველაფერს, თუ როგორ უნდა მოხდეს პროდუქტების მოწოდება. მადლობა კომპანია „არქის“ და ყველა იმ ადამიანს, იმ მოხალისეებს, ვინც ჩართულია ამ ღონისძიებაში“, - განაცხადა კახა კალაძემ.

უწყების ცნობითც, მარტოხელა ხანდაზმულებისთვის საკვები პროდუქტითა და პირველადი საჭიროების ნივთებით უზრუნველყოფის კამპანია გაგრძელდება და სისტემატურ ხასიათს მიიღებს. ბიზნესკომპანიებს, რომელთაც ქველმოქმედების სურვილი აქვთ, პროდუქტების მიტანა თბილისში, ბელიაშვილის N5-ში მდებარე სპეციალურ ფართში შეუძლიათ.

„საქართველოს წითელი ჯვრის საზოგადოებასა და ნუტრიციოლოგებთან ერთად, შედგენილია მინიმალური პაკეტი, რომელიც დაახლოებით, ათი დღის მარაგია და ორ მიმართულებას მოიცავს: საკვები პროდუქტები და მედიკამენტები, ასევე, ჰიგიენური საშუალებები. ესენია: შაქარი, ბრინჯი, ჩაი, მაკარონი, წიწიბურა, შვრიის ფანტელი, ხორბლის ფქვილი, ზეთი, მარილი, ლობიო, ორცხობილა და პირველადი მოხმარების საგნები.

აღნიშნული პაკეტი მარტოხელა მოხუცებს დატრენინგებული მოხალისეების საშუალებით გადაეცემათ, მოხალისეობის მსურველები კი მერიის ცხელ ხაზზე: 2 72 22 22 უნდა დარეგისტრირდნენ. ღონისძიება უწყებათაშორის საკოორდინაციო საბჭოს რეკომენდაციით ხორციელდება.

მარტოხელა ხანდაზმულებისთვის განკუთვნილი ნობათების გადაცემის პროცესს თბილისის მერის მოადგილე ილია ელოშვილი და საკრებულოს დეპუტატები დაესწრნენ”,- ნათქვამია ინფორმაციაში.

ანდრო გოცირიძე - პოლიტიკური სარგებლის მიღების მიზნით, მმართველი პარტია არ ერიდება მოსახლეობის დაპირისპირებას, პოლარიზაციის გაღვივებას და აღვირახსნილ ანტიდასავლურ კამპანიასაც კი
მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ქართული პრესის მიმოხილვა 28.03.2024
„გავერთიანდეთ ჩვენი გმირებისთვის“ - სილქნეტი დაჭრილ მებრძოლთა თანადგომის ფონდის საქმიანობის ანგარიშს აქვეყნებს
საქართველოს უნივერსიტეტი -  iOS LAB Apple ავტორიზებული სასწავლო ცენტრი
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს